Wednesday, December 26, 2012

မြတ်သော ဆရာ..သူလိုဆရာ @ ဆရာဦးသန်းရ


အခုတလော ကြားကြားနေရတာ နားထဲမှာ မချမ်းသာ၊
ကလေးတွေ ပညာရေးအတွက် ပညာရေးဘတ်ဂျက်က နည်း၊
ကျောင်းဝင်ကြေးဘာကြေးညာကြေးက မိုးပေါ်ရောက် ၊
ဆရာဆရာမတွေက ကျူရှင်မှာပဲစာတွေသင်၊
ကလေးတွေက ဂိုက်ပါမှ စာဖတ်၊
ကျူရှင်စားရိတ်က သိန်းချီကုန်၊
ဒါတွေရှောင်ချင်လို့ ဘိုကျောင်းထား၊
မြန်မာစကားက ထော့ကျိုးဖြစ်၊
ကလေးတွေက ဆရာဆရာမကို မလေးစား။
လမ်းတွေ့လို့မှ မနှုတ်ဆက်ချင်၊
ဆရာဘ၀ကို ဘယ်သူမှ မဖြစ်ချင်တော့။
တစ်ခြားအလုပ်မရမှ ဆရာဆရာမလုပ်။
လုပ်ရင်လည်း အောက်ဆိုဒ်ရှာ။
ဒီလို အဆိုးသံသရာကြီးထဲမှာ ဆရာဆရာမဆိုတဲ့ စကားကြားရင်
ကလေးတွေကို သူ့အိမ်မှာ ကျူရှင်တက်ဖို့ ညှစ်နေညစ်နေတဲ့ရုပ်၊
အတန်းထဲမှာ ဇာထိုးပန်းထိုးမုန့်ရောင်းနေတဲ့ရုပ်၊
ကျောင်သားမိဘဆီက လက်ဆောင်လာရင်တစ်မျိုး မလာရင်တစ်မျိုးရုပ်လို့ပဲ
မြင်ယောင်နေကြပါတယ်။
ဆရာတွေဘက်ကလည်း ဒီလောက်နည်းတဲ့ လခနဲ့
အောက်ဆိုဒ်မှ မရှိရင် မိသားစုစားဝတ်နေရေး ဘယ်လို ထောက်ပံ့မလဲ။
ပီတိကိုစား အားရှိပါ၏ ဆိုတာ စာထဲပဲသွားပြော
ဆိုတာတွေ အပြန်အလှန်ကြားနေရပါတယ်။
ကျွန်မတို့ကတော့ အလွန်ကံကောင်းလှစွာ
ဆရာဆရာမကောင်းတွေနဲ့ တွေ့ခွင့်ကြုံခဲ့ရပါတယ်။
အဲဒီထဲက ဆရာတစ်ယောက်အကြောင်းလေး ပြောပြချင်ပါတယ်။
ကျွန်မရဲ့ ဆရာနာမည်က ဦးသန်းရ ပါ။
ကျွန်မရဲ့ နယ်မြို့လေးသေးသေးလေးရဲ့ အထက်တန်းကျောင်းက
သင်္ချာပြတဲ့အထက်တန်းပြဆရာပါ။
ဆရာတို့က ဗုဒ္ဓဘာသာဝင် ကရင်လူမျိုးပီပီ အလွန်ရိုးပါတယ်။
ဆရာဟာ ဉာဏ်ထက် ၀ီရိယအားပိုကောင်းတဲ့သူပါ။
ဆရာနဲ့ ကျွန်မ အစ်မ၀မ်းကွဲတွေက တစ်တန်းတည်းသားတွေဆိုတော့ ဆရာငယ်ငယ်က ၇တန်းမှာ အစမ်းစာမေးပွဲ ပထမရလို့ စာမေးပွဲကြီး မဖြေပဲ အောင်ခဲ့ရတဲ့ အကြောင်းကြားဖူးပါတယ်။
ဆရာကတော့ တစ်ခါမှ မပြောပြပါဘူး၊ကျွန်မတို့လို ကြုံကြွားထဲ မပါဘူးဆိုပါတော့။
ဆရာ့ညီမ အငယ်ဆုံးက ကျွန်မနဲ့ ရွယ်တူ အတန်းတူ သူငယ်ချင်းပါ။သူကလည်း ရိုးလိုက်တာမှ
အဲဒီ အရွယ်ကတည်းက ထားတဲ့ ကျစ်ဆံမြီးရှည်ရှည် တင်းတင်းကျစ်ကျစ်ထားတဲ့ စတိုင်ကနေ ခုဆို ညှပ်ကလစ်နဲ့ ဆံပင်တွေ ခေါက်တင်ထားတဲ့ ပုံပြောင်းတာလေးပဲရှိပါတယ်။မောင်နှစ်မအားလုံး အ၀တ်ရိုးရိုး အစားရိုးရိုး စကားရိုးရိုးတွေချည်းပါပဲ။
ကျွန်မတို့ ဆယ်တန်းမှာ ဆရာက သင်္ချာသင်တော့ တစ်တန်းလုံး နားမလည်မချင်း အထပ်ထပ် ရှင်းပြပေးတတ်တဲ့ ဆရာပါ။
နှစ်လည်လောက်ရောက်ပြီဆိုရင် စနေ၊တနင်္ဂနွေ မနက်တိုင်း special class ခေါ်ပြီး အပိုသင်ပေးပါသေးတယ်။
သူနားရမယ့် အချိန်တွေမနားပဲ ကျောင်းမှာပဲ တစ်တန်းလုံးကို အခမဲ့ခေါ်သင်တာပါ။
အိမ်စာတွေဆိုရင် အများကြီးပေးတတ်လို့ ကျောင်းသားတွေက ဆရာဦးဘီးစိပ် အချိန်ဆို စာအုပ်အပိုတွေ ဆောင်သွားလို့ နောက်ကြရတဲ့ အထိပါပဲ။
ကျွန်မတို့ သူငယ်ချင်း ၆ယောက်လောက်ကတော့ စာဂျပိုးတွေမို့လို့ ဆရာပေးသလောက် အိမ်စာမညည်းတမ်းတွက်တတ်တဲ့ ဆရာ့ အချစ်တော် အုပ်စုပါ။
တစ်ခါတော့ အခြားဆရာတစ်ယောက် မ၀င်နိုင်တဲ့ အတန်းကို ဆရာ အစားဝင်သင်ပါတယ်။ သူ့ပုံမှန်အတန်းမဟုတ်တဲ့အတွက် နာရီဝက်လောက်သင်ပြီးတော့ ဆရာက အိမ်စာ ၁၀ပုဒ်ပေးပြီး နားပါတယ်၊
ကျန်တဲ့ သူငယ်ချင်းတွေ စကားပြောနေချိန်မှာ ကျွန်မက အိမ်စာတွေ ထိုင်တွက်နေပါတယ်။(အမှန်တော့ အိမ်ရောက်ရင် အပြင်စာတွေ ဖတ်ချင်လို့ပါ)သင်္ချာပုစ္ဆာ ၁ ပုဒ်က တွက်နည်း ၂မျိုးတွက်လို့ရတော့ ၂ မျိုးလုံးတွက်ကြည့်လိုက်သေးတယ်။ကိုယ့်ဖာသာ စိတ်ဝင်တစားတွက်နေတော့ ဆရာဘယ်အချိန်က ကြည့်နေမှန်းတောင် သတိမထားမိဘူး၊အားလုံးပြီးလို့ ခါးဆန့်လိုက်တော့မှ ဆရာက ကျွန်မစာအုပ်ကို ယူပြီး တစ်တန်းလုံးကို ထောင်ပြပါတယ်။ဒီမှာကြည့်ကြစမ်း၊မင်းတို့ စကားပြောနေချိန် မင်းတို့သူငယ်ချင်းက အိမ်စာတွေ အားလုံးလုပ်ပြီးသွားပြီ၊တွက်လို့ရတဲ့ နည်းတောင် အမျိုးမျိုးပြောင်းတွက်ထားသေးတယ်လို့ တစ်တန်းလုံးကြားအောင် ပြောပြပါတယ်။ကျွန်မဖြင့် ကိုယ့်ကို ပေါ်တင်ကြီး ချီးကျူးတော့ မျက်နှာပူပူနဲ့ ဒါပေမယ့် သဘောလည်းကျတာပေါ့၊ ဆရာ့ဘာသာ သင်္ချာကိုလည်း ကြိုးစားလိုက်တာ ၁၀တန်းအောင်တော့ အမှတ် ၉၀ကျော်ရခဲ့ပါတယ်။အဲဒီလို ကျောင်းသားတွေကို ၀ီရိယရှိအောင်လည်း ပျိုးထောင်ပေးတတ်တဲ့ ဆရာပါ။
ဆရာ့ကို ကျောင်းသားတွေက ကြောက်ချစ်ရိုသေ မဟုတ်၊ နည်းနည်းမှ မကြောက်ကြပေမယ့် အားလုံးက ချစ်ကြပါတယ်။ဆရာလူပျိုကြီးကို ကျောင်းသားကြီးတွေက ဆရာမ ငယ်ငယ်ခေတ်ဆန်ဆန်နဲ့ ၀ိုင်းပြီးလှော်ကြတာ။ဆရာက စကားလည်းနည်း၊ရိုးလည်းရိုးတော့ ဆရာမလည်း အခြားသူနောက် ပါသွားပါလေရော။ ကျွန်မတို့ တက္ကသိုလ်တက်နေချိန် ဆရာ့မိဘတွေ အစွမ်းနဲ့ပဲနေမှာပါ ၊ရိုးသားတဲ့ ကရင်အမျိုးသမီးလေးနဲ့ အိမ်ထောင်ကျပြီး သမီးလေး၃ယောက်ရပါတယ်။ဆရာ့ညီမတွေဖြစ်တဲ့ ကျွန်မ သူငယ်ချင်းနဲ့ နောက်တစ်ယောက်ကလည်း ကျောင်းဆရာမတွေချည်းပါပဲ။ကျွန်မ သူငယ်ချင်းကတော့ အခုထိ မူလတန်းကျောင်းအုပ် အပျိုကြီး ရိုးရိုးကြီးပါပဲ။
ကျွန်မကျောင်းပြီးလို့ မြို့မှာဆေးခန်းပြန်ဖွင့်နေချိန် ဆရာဟာ သူ့ကိုအလကားကုပေးနေမှာ အားနာလို့ထင်ပါရဲ့ ကျွန်မဆေးခန်းကို တစ်ခါမှ မလာပါဘူး။ဆေးခန်းပိတ်ပြီး အဖေ့ပွဲရုံမှာ ကူလုပ်ပေးနေချိန် တနင်္ဂနွေ တစ်ညနေ စာရင်းတွေလုပ်နေတုံး စားပွဲရှေ့မှာ လူရိပ်တွေ့လို့မော့ကြည့်လိုက်တော့ ချွေးတွေရွှဲနေတဲ့ ဆရာ့ကိုတွေ့လိုက်ရပါတယ်။ ဟာဆရာ ဘယ်ကလာတာလဲလို့ နှုတ်ဆက်လိုက်တော့ ကမ်းနားကလှေထဲမှာ ငရုတ် ၂အိတ်ရောင်းဖို့်ပါလာတယ်တဲ့၊ကျွန်မ စိတ်ထဲ ဆရာ့ ဆွေမျိုးတွေ လက်ဆောင်ပေးလိုက်တာ ပြန်ရောင်းမယ်ထင်မိတယ်။ဒါနဲ့ အလုပ်သမားတွေခေါ် အိတ်တွေတင်ခိုင်းရင်းနဲ့ ဆရာ့ကို ဗျူးကြည့်တော့မှ တစ်နာရီလောက် လှေလှော်သွားရတဲ့ရွာက ဆရာ့အမျိုးတွေပေးတဲ့ လယ်တစ်ကွက်မှာ ကျောင်းပိတ်ရက်တွေ ငရုတ်သွားစိုက်ပါတယ်တဲ့။ စနေ တနင်္ဂနွေတွေဆို မနက်စောစော လှေလှော်သွား ၊ရေတင၊် ပေါင်းလိုက်၊ငရုတ်ခူး၊နေလှန်း ကြားရက်တွေတော့ အမျိုးတွေ ၀ိုင်းကြည့်ပေးကြပါတယ်တဲ့။ ကမ်းနားကလှေထဲလိုက်ကြည့်တော့ နေပူခံအောင် တဘက်ကြီး ခေါင်းပေါင်းထားတာ ကျွန်မသူငယ်ချင်းပါ။
ဆရာတို့မောင်နှစ်မ ယူလာတဲ့ ငရုတ်အိတ်ကို အလေးချိန် မှန်အောင် ကိုယ်တိုင်ချိန်ပေးပြီး ဆရာ ၂၆ ပိဿာ ၅၀သား ရှိတယ်နော်ဆိုတော့ ချိန်မလာပါဘူး၊မင်းမှန်အောင်ချိန်ပေးမှာပဲတဲ့။ ချိန်ပြီးအိတ်ကို အလုပ်သမားလေးတွေ သွန်ခိုင်းလိုက်တော့ အထဲက ငရုတ်တွေက အခြားတောင်သူတွေနဲ့မတူ ဂျွမ်းဂျွမ်းမြည်အောင် နေလှန်းပြီး ဖလံ၊လုံးပျော့ တစ်တောင့်မှ မပါအောင် ရွေးသန့်ထားပါတယ်။တပည့်ကို မကောင်းတာပေးရမှာ အားနာလို့ အပင်ပန်းခံလုပ်ထားတာ သိသာလိုက်တာ။ ဈေးကို အဲဒီနေ့ရဲ့ အမြင့်ဆုံးဈေးနဲ့ တွက် ၊ကျသင့်တဲ့ ပိုက်ဆံပါ သေချာ သစ်သစ်လေးတွေရွေးပြီး ဆရာ့လက်ထဲ ရိုရိုသေသေ ထည့်ပေးတော့ ဆရာက ရေတောင်မရေပါဘူး။မင်းပေးတာ ပြည့်မှာပါကွာတဲ့။
စာရေးတွေရော အလုပ်သမားလေးတွေရောက ဆရာ့တပည့်တွေချည်းဆိုတော့ ဆရာလာရင် အားလုံး ပျာပျာသလဲလုပ်ပေးကြပါတယ်။ အလုပ်သမားတွေကလည်း ဆရာ့ကိုဆို သူတို့ရဲ့ လုပ်အားခ မယူတော့ပါဘူး။
ဆရာက အပြင် ကျူရှင်လည်းမပြပါဘူး၊ကျောင်းသားလည်း အိမ်ခေါ် မသင်ပါဘူး။ပညာရေးဌာနက ချမှတ်ထားတဲ့ စည်းမျဉ်းဥပဒေတွေ တစ်ခုမှ မဖောက်ဖျက်တဲ့ သူပါ။ မလောက်ငတဲ့ အိမ်စားရိတ်ကိုဖြည့်ဖို့ အပင်ပန်းခံ အလုပ်လုပ်ပြီးရှာပါတယ်။ တစ်နှစ်ကို ယာထွက် ငရုတ်၂ခါလောက် လာရောင်းပြီး အဲဒီဝင်ငွေနဲ့ လောက်အောင် ကြွေးမြီမရှိရအောင် ဆရာ့အိမ်သူကလည်း ခြိုးခြံသုံးရှာပါတယ်။
ကျွန်မ ရန်ကုန်ကိုပြောင်းလာတဲ့အခါ ဆရာရန်ကုန်ကို ကျောင်းကိစ္စနဲ့ လာရင် လာတွေ့တတ်ပါတယ်။အဲဒီအချိန် ကျောင်းမှာကွန်ပျူတာခန်းလုပ်ပြီး ကလေးတွေကို ကွန်ပျူတာသင်ပေးတော့ သင်္ချာကို ချစ်တဲ့ဆရာဟာ ကွန်ပျူတာကိုလည်း သိပ်ချစ်သွားပါတယ်။ကျောင်းကွန်ပျူတာခန်းရဲ့ တာဝန်ကို ဆရာပဲ ယူထားပြီး စာသင်ချိန်ကလွဲရင် နေ့နေ့ညညကွန်ပျူတာသင်ခန်းစာ စာအုပ်တွေနဲ့ လေ့လာနေတတ်ပါတယ်။ ကျွန်မနဲ့တွေ့တဲ့အခါတွေမှာ မင်းကတော့ ကွန်ပျူတာတော်တော်တတ်နေရောပေါ့နော်၊ဆရာ သိပ်အားကျတာပဲလို့ ပြောတတ်ပါသေးတယ်။ ဆရာထင်သလောက် မတတ်ပါဘူးလို့ ရှင်းပြရပါတယ်။
လွန်ခဲ့တဲ့ ၅နှစ်က တစ်ရက်မှာ နယ်က သူငယ်ချင်းဆရာဝန်ဆီက ဖုန်းဝင်လာပါတယ်။ဆရာ ဦးသန်းရ ကျောင်း
ကွန်ပျူတာခန်းထဲမှာ ဦးနှောက်သွေးကြောပေါက်ပြီး မေ့လဲသွားလို့ ရန်ကုန်က ဦးနှောက်နဲ့ အာရုံကြောခွဲစိတ်ကု ဒေါက်တာ ဦးစောဆိုင်မွန်သာရဲ့ ကွယ်ကဘောဆေးခန်းကို လွှတ်လိုက်ပါတယ်တဲ့၊(ကရင် အမျိုးသားချင်းလည်းဖြစ် ၊စားရိတ်လည်း သက်သာစေချင်လို့ ညွှန်လိုက်တာပါ)လိုက်ပို့တဲ့ ကားဆရာက ကွယ်ကဘောဆေးခန်း မရှာတတ်တော့ SSC ကိုရောက်နေတယ်လို့ သတင်းပေးလာပါတယ်။
SSCရဲ့ ICU ထဲသွားရှာတော့ ဆရာ့ကို ခွဲစိတ်ပြီး သတိလစ်နေဆဲ စက်တန်းလန်းနဲ့ တွေ့ရပါတယ်။ကိုယ်တတ်နိုင်သလောက်ငွေကို စောင့်နေတဲ့ ဆရာ့ အမျိုးသမီးလက်ထဲထည့်ရင်း အားပေးရပါတယ်။အခြားသူငယ်ချင်းတွေဆီလည်း ဖုန်းတွေ တစ်ဆင့်တစ်ဆင့်ဆက်ကြပြီး ဆရာ့ကို ကူညီကြဖို့ ဆော်သြကြပါတယ်။ ဆရာ့မိတ်ဆွေတွေကလည်း ကူညီကြပါတယ်။ဆေးရုံပေါ်မှာ တစ်လကျော်ကုသပြီး အသက်ရှင်လာပေမယ့် ခြေတစ်ဖက်လက်တစ်ဖက်မသန်တော့တဲ့ အခြေအနေနဲ့ မြို့ကိုပြန်သွားနိုင်ပါတယ်
ဆွဲနေတဲ့ ခြေနဲ့လက်ကို လေ့ကျင့်ခန်း လုပ်နေရပါတယ်။သူငယ်ချင်းဆရာဝန်ကပဲ ဆရာ့ကို အခမဲ့ အိမ်တိုင်ယာရောက်ကြည့်ပြီး ကုသပေးနေပါတယ်။ဆေးပင်စင်လည်း ယူလိုက်ရပါတယ်။
မြို့ပြန်တဲ့အခါ ဆရာ့ကိုသွားကန်တော့ရင် ဆရာက မျက်ရည်တွေလည်ပြီး မင်းတို့ တပည့်တွေကြောင့် ဆရာမသေတာပါကွာလို့ ပြောတတ်ပါတယ်။ဆရာ အခုကျောင်းတာဝန်က အားသွားတော့ ဗုဒ္ဓဘာသာကို လေ့လာနေပါတယ်တဲ့။စာမဖတ်နိုင်သေးတော့ တပည့်တစ်ယောက် ကန်တော့ထားတဲ့ CD player လေးနဲ့ တရားခွေတွေ နာပါတယ်၊သိပ်တော့ နားမလည်သေးဘူးလို့ပြောရှာပါတယ်။ကိုယ့်မှာရှိတဲ့ လွယ်ကူရှင်းလင်းတဲ့ တရားခွေတွေ ဆရာ့ဆီ ပို့ပို့ပေးရပါတယ်။
နောက်ဆုံးတစ်ခေါက်ရောက်တော့ ဆရာ့ခြေတွေ လက်တွေ အတော်ကောင်းလာပါတယ်။လူတွဲမပါပဲ လျှောက်နိုင်လာပါပြီ။ ဆရာ့ကို အိမ်ဝမှာ ဦးထုပ်ဆောင်း လွယ်အိတ်လေးတစ်လုံးနဲ့ အပြင်ထွက်မယ့်ပုံနဲ့ တွေ့လိုက်ရတော့ ဆရာအပြင်သွားမယ်မှန်း သိလိုက်ရပါတယ်။တပည့်တစ်ယောက်ဖွင့်ထားတဲ့ ကွန်ပျူတာဂိမ်းဆိုင်မှာ ကွန်ပျူတာသင်ခန်းစာတွေ ပြန်လေ့ကျင့်နေတာပါတဲ့။အဲဒီ တပည့်ကလည်း
ဆရာ့ကိုဆို အခမဲ့ ပေးသုံးပါတယ်။ဆရာ့ဇွဲနဲ့ ၀ါသနာပေါ် တစ်စိုက်မတ်မတ်ရှိပုံကတော့ အံ့မခန်းပါပဲ။
ဘယ်ခါတွေ့တွေ့ ဆရာပြောနေကျစကားကတော့ မင်းတို့ တပည့်တွေကြောင့် ဆရာ မသေတာပါဆိုတဲ့ စကားပါပဲ။
ဆရာ့လိုပဲ စေတနာအပြည့်နဲ့ သင်ကြားပေးကြတဲ့ ဆရာဆရာမတွေ ကျွန်မ ဘ၀ တစ်လျှောက်လုံး အများကြီးတွေ့ခဲ့ရပါတယ်။အခုထိလည်း သင်တန်းတွေ တက်နေဆဲမို့ စေတနာကောင်းတဲ့ ဆရာဆရာမတွေ တွေ့နေဆဲပါပဲ။အဲဒီထဲမှာ တချို့ဆရာတွေက မိသားစု ကျောထောက်နောက်ခံကောင်းရှိတာကြောင့် စားဝတ်နေရေး ပူပင်စရာမလိုတော့ တပည့်တွေက ဖြည့်ဆည်းပေးစရာမလိုတဲ့အတွက် တပည့်အကျိုးကို
သိသိသာသာမခံစားရလို့ ဥပမာမပြပေးရတာပါ။။
ဆရာကတော့ တကယ့်ကို တပည့်မရှား တစ်ပြားမရှိ ပီတိကိုစား အားရှိပါ၏ ဆိုတဲ့ ကဗျာအတိုင်းပါပဲ။
SSC လို ပုဂ္ဂလိကဆေးရုံမှာ အကြီးစားခွဲစိတ်မှုရဲ့ စားရိတ်ကို၊နောင်ကျန်းမာလာသည်ထိ ကုသရတဲ့ စားရိတ်ကို
တစ်သက်လုံး ရိုးသားစွာ ပညာပေးလာတဲ့ ဆရာ့ရဲ့ မေတ္တာစေတနာ ရောင်ပြန်ဟပ်ပြီး အကုန်ခံနိုင်သွားတာပါ။
ဒါတစ်ကယ့် အဖြစ်မှန် နာမည်မှန်တွေပါပဲ။ ဆရာ ခုထိ ကျွန်မတို့မြို့မှာ ကျန်းမာစွာရှိနေပါတယ်။
ကျွန်မတို့ ဆေးတက္ကသိုလ် (၁)က ဒုတိယနှစ်အမ်ဘီဘီအက်စ မှာ သင်ပေးတဲ့ ဆရာမကြီး ဒေါ်နော်မာစော၊ဆရာဒတ် တို့ ဆိုရင်လည်း အဲဒီလိုပဲ ပြည်တွင်းပြည်ပက တပည့်တွေ ထောက်ပံ့ကူညီကြတဲ့ တစ်နှစ်တစ်နှစ် သိန်းချီငွေတွေနဲ့ နောက်ဆုံးအချိန်ကို အေးအေးချမ်းချမ်း ကျော်ဖြတ်သွားခဲ့ပါတယ်။ဆေး(၂)က ဆရာကြီး ဦးမောင်မောင်စိန်ကိုလည်း တပည့်တွေ ကန်တော့ ထောက်ပံ့ကြတာ ဆေးတက္ကသိုလ်တွေရဲ့ website တွေမှာ တွေ့နေရပါတယ်။သိတတ်တဲ့ တပည့်တွေကလည်း မကျန်းမာတဲ့၊နွမ်းပါးတဲ့ဆရာတွေကို ကူညီချင်လိုို့ အဖွဲ့တွေ ဖွဲ့ပြီး လှုပ်ရှားနေကြပါတယ်။
ဒီလို ဆရာကောင်းတွေ နဲ့ ဆုံဆည်းခဲ့ရတဲ့ ကျွန်မတော့ ဘ၀ပေးအခြေအနေ အရ ဆရာများလုပ်ဖြစ်ခဲ့ရင် ဆရာဦးသန်းရလို ဆရာမျိုးပဲ လုပ်မှာပါ။ဆရာဟာ ကျွန်မရဲ့ Role Model ပါ၊ကိုယ့်လက်ကိုယ့်ခြေ နိုင်တုံးမှာ အရိုးသားဆုံး ခြိုးခြံချွေတာပြီးနေပါမယ်။ အကယ်၍ မကျန်းမာတဲ့ အနေအထားရောက်ရင်တော့ ကျွန်မရဲ့ ထားခဲ့တဲ့ မေတ္တာ စေတနာတွေ ရောင်ပြန်ဟပ်မယ်ဆိုတာ ဆရာ့ကို ကြည့်ပြီး ယုံကြည်ပါတယ်။
ကျွန်မလိုပဲ ဆရာကောင်းတွေခေတ်နဲ့ ဆုံဆည်းဖူးကြတဲ့ ကျွန်မတုိ့ အရွယ် ဆရာဆရာမတွေ ရှိမှာပါ။ကျွန်မတို့ဆရာတွေ ကျွန်မတို့အပေါ် ကောင်းခဲ့သလို ကျွန်မတို့ကနေ နောင်တပည့်တွေ အပေါ်ကောင်းမပေးနိုင်ဘူးလား။
တပည့်တွေကို ငါ့ဆီ ကျူရှင်လာတက်မှ အမှတ်ကောင်းမယ်လို့ ပြောနေစရာလိုသေးလား၊အဲဒီလို ခြိမ်းခြောက်ခံပြီး လာတက်ရတဲ့ ကလေးတွေက ကိုယ့်အပေါ် လေးစားမှုရော ရှိပါ့မလား၊ဒီလို ရှာလို့ရတဲ့ငွေတွေနဲ့ လှလှပပ ၀တ်နိုင်စားနိုင်တာ နောင်ရေးစိတ်အေးရမယ့် အခြေထိ စုဆောင်းနိုင်ရဲ့လား။
ဆရာဆိုတဲ့ Image ကို ဘယ်လို ပုံဖော်စေချင်ကြလဲ စဉ်းစားကြစေချင်ပါတယ်။

Written by Aye Aye Myint @ SS Avenue of WKA

No comments:

Post a Comment