မိုးယုစံ ရဲ. အချစ်ရေး အိမ်ထောင်ရေး

 
Miss Now How ပြိုင်ပွဲမှ စတင်ကာ အနုပညာသက်တမ်း ရှစ်နှစ်နီးပါးစလုံး ပရိသတ်တွေရဲ့ ချစ်ခင်အားပေးမှုကို ဆက်တိုက်ဆိုသလို ရရှိခဲ့သူကတော့ မိုးယုစံပါ။ ဗီဒီယိုလောကပျက်နေတဲ့အတွက် ကားရိုက်တွေထက်ကြော်ငြာပိုင်းကိုပဲ ဦးစားပေးလုပ်ဖြစ်နေတဲ့ မိုးယုစံက အနုပညာလောကနဲ့အနည်းငယ် အဆက်ပြတ်နေပေမယ့် လက်ရှိမှာ သူမရဲ့မင်္ဂလာသတင်းကလဲ ပရိသတ်တွေရဲ့ စိတ်ဝင်အစားဆုံး သတင်းတစ်ပုဒ်ဖြစ်နေပြန်ပါတယ်။ ၂၀၁၆ ထဲမှာ မင်္ဂလာသတင်းဖြစ်ဖို့များနေတဲ့ မင်းသမီးမိုးယုစံရဲ့ မင်္ဂလာသတင်းအနည်းငယ်နဲ့လက်ရှိအနုပညာအလုပ်များအကြောင်းကို မေးမြန်းပြောဆိုဖြစ်တဲ့အခါ
-မိုးယု အခုနောက်ပိုင်း အနုပညာနယ်ပယ်မှာ နည်းနည်းပျောက်နေသလိုပဲ။
 အနုပညာဖက်ကကျတော့ ညီမအရမ်းကြီးလဲ မရိုက်ဖြစ်တော့ဘူး။ ညီမနဲ့အဆင်ပြေမယ်ထင်တဲ့ဟာ၊ ညီမလုပ်ချင်တဲ့ကားမျိုးလေးတွေလောက်ပဲ ညီမရိုက်ဖြစ်တော့တယ်။ ကြော်ငြာတွေကတော့ ရိုက်ဖြစ်ပါတယ်။ ကားရိုက်ပိုင်းကတော့ သိပ်မရိုက်ဖြစ်တော့ဘူး။ နောက်ပြီးတော့ လူတွေအများကြီးနဲ့ဆက်ဆံရတဲ့ဟာကိုလဲ သိပ်ပြီး စိတ်မပါတော့ဘူး။ ပြီးတော့ တစ်ယောက်နဲ့တစ်ယောက်စိတ်ချင်းကလဲ မတူကြဘူးလေ။ လူတွေစိတ်က တစ်ခါတစ်လေ ကိုယ်တွေစိတ်လိုမျိုးမဟုတ်ဘူး။ မကောင်းတဲ့စိတ်တွေက များနေတဲ့အခါကျတော့ အဲ့ဒီလိုလူတွေနဲ့သိပ်ပြီးမဆက်ဆံချင်တော့ဘူး။
-အနုပညာအလုပ်ဆိုတာ လူတွေအများကြီးနဲ့ဆက်ဆံရတဲ့အလုပ်တစ်ခုဖြစ်သလို ကိုယ်လဲတောက်လျှောက်လုပ်လာခဲ့တယ်ပေါ့။ အခုနောက်ပိုင်းက လူတွေအများကြီးနဲ့ဆက်ဆံရတာကို မနှစ်မြို့တော့တာလဲ။
ညီမစောစောကပြောသလိုပေါ့။ တစ်ခါတစ်လေ လူတွေရဲ့စိတ်ကမတူဘူးလေ။ တစ်ခါတစ်လေ သူများစိတ်မပြောနဲ့ကိုယ်ကိုတိုင်ရဲ့စိတ်တောင်မှ အပြောင်းအလဲရှိတော့ ကိုယ့်စိတ်ကိုတောင်ဘာမှန်းမသိတာ သူများစိတ်ဆိုရင် ပိုခန့်မှန်းရခက်တယ်လေ။ လူတွေကမကောင်းတဲ့ဖက်က ပိုများတယ်။ လူတွေနဲ့ဆက်ဆံရတာ တစ်ခါတစ်လေ တချို့လူတွေနဲ့ကြောက်ဖို့ကောင်းတယ်။ ညီမနဲ့အဲ့ဒီလိုက လုံးဝအဆင်မပြေနိုင်ဘူး။ အဲ့ဒီအတွက်တချို့ဟာတွေအဲ့ဒီလိုလူမျိုးတွေနဲ့ပတ်သက်ရမယ်ဆို ညီမရှောင်တာများပါတယ်။
-အရှေ့မှာ ဘယ်လိုအဖြစ်အပျက်မျိုးနဲ့ကြုံခဲ့ဖူးလို့လဲ။
ဒါကတော့လူတိုင်းကြုံမှာပဲ။ လူ့လောကထဲမှာ လူလူချင်းဆက်ဆံရတာဆိုတော့ ညီမတစ်ယောက်တည်းမဟုတ်ဘူး။ အကုန်လုံးကြုံရမှာပါပဲ။ ဘယ်လိုကြုံလဲဘာညာဆိုတော့ ညီမလဲပြန်မပြောပြချင်တော့ပါဘူး။ တစ်ခါတစ်လေတချို့လူတွေက ကိုယ့်အပေါ် ကောင်းသလိုလိုနဲ့မကောင်းတာတွေလဲ ရှိတယ်လေ။ အဲ့ဒါကြောင့်ပါ။ အခုချိန်မှာလဲ ဗီဒီယိုလောကကပျက်နေပြီလေ။ ပျက်နေပြီဆိုတော့ ညီမကတော့ဗီဒီယိုဖက်ကို သိပ်ပြီးစိတ်လဲမ၀င်စားတော့ဘူး။ ညီမအခုလတ်တလောလုပ်နေတာက ကြော်ငြာပိုင်းပေါ့။ ကြော်ငြာပိုင်းက လုပ်ရတာပိုလဲစိတ်ပေါ့ပါးတယ်။ ပိုပြီးတော့လဲ ပျော်ဖို့လဲကောင်းတယ်။
-အခုလက်ရှိ အနုပညာလှုပ်ရှားမှု အနေနဲ့ ဘာတွေလက်ခံထားလဲ။
အခုနောက်ပိုင်းကတော့ မိုးယုကြော်ငြာတွေပဲရိုက်ဖြစ်တယ်။ ကြော်ငာတွေလက်ခံထားတယ်။ အခုနေပြည်တော်မှာ ကြော်ငြာသုံးခုသွားရိုက်ရမယ်။ ပိုးထည်ကြော်ငြာရယ်၊ ရေသန့်ကြော်ငြာရယ်၊ နောက်တစ်ခုကတော့ အတိအကျမသိသေးပါဘူး။ ကြော်ငြာဓာတ်ပုံသွားရိုက်ရမှာပေါ့။ ကြော်ငြာလဲပါတယ်။ အဲ့ဒီမှာ၂ရက်လောက်ပဲကြာပါမယ်။
-လျှောက်လှမ်းလာတဲ့ အနုပညာသက်တမ်း ရှစ်နှစ်ရှိပြီပေါ့။ ဒီအတိုင်းအတာမှာ မိုးယုက နာမည်ပျက်၊ ကောလဟလထွက်တာနည်းတဲ့မင်းသမီးထဲမှာပါတဲ့အတွက်ကိုယ့်ရဲ့ ကိုယ့်ကျင့်တရားပိုင်းနဲ့ပတ်သက်ပြီး ဘယ်လိုမျိုးထိန်းသိမ်းဖြစ်လဲ။
ညီမစလုပ်ကတည်းက မကောင်းတဲ့သတင်းမထွက်အောင် အတတ်နိုင်ဆုံးနေတယ်။ အားလုံးကို အမှန်ကန်ဆုံးပဲ ဆက်ဆံတယ်။ နောက်ပြီးညီမက အလုပ်နဲ့အိမ်နဲ့ပဲ သွားတာများတယ်။ တခြားလဲ ဘယ်မှမသွားဘူး။ အလုပ်ပြီးရင်အိမ်မှာပဲ။ အပြင်သွားလေ့မရှိဘူး။ အဲ့ဒါကြောင့်တော်ရုံတန်ရုံ သတင်းထွက်တာမရှိဘူး။ ထွက်ခဲ့တဲ့ သတင်းတွေဆိုတာလဲ ညီမတစ်ခါတည်း ရှင်းပစ်တာပေါ့။ သူများတွေ ထင်ရာမြင်ရင်ပြောကြတာမျိုးတွေရှိပါတယ်။ အဲ့ဒါတွေကလဲ တစ်ခုမှမဟုတ်ပါဘူး။ ကာယကံရှင်နှစ်ယောက်စလုံးက အသိဆုံးပဲ။ သူများတွေထင်ရာမြင်ရာလျှောက်ပြောနေတာတွေက တစ်ခုမှမဟုတ်ပါဘူး။
-၇လပိုင်းမှာလဲမွေးနေ့ရှိတယ်နော်။ နှစ်တိုင်းက မွေးနေ့ကို ပရိသတ်တွေနဲ့ ပရဟိတအလုပ်တွေနဲ့ပဲဖြတ်သန်းနေကြဆိုတော့ ဒီနှစ်ရော ဘယ်လိုဖြတ်သန်းဖြစ်မလဲ။
ဒီနှစ်မိုးယု အသက် ၂၅ နှစ်ပြည့်ပါ။ အမှန်အတိုင်းပြောရင်မွေးနေ့တိုင်းကိုညီမ ပရိသတ်တွေနဲ့ပဲဖြတ်သန်းလေ့ရှိတယ်။ အလှူအတန်းတွေ လုပ်ဖြစ်လေ့ရှိတယ်။ ဒီနှစ်လဲအဲ့ဒီလိုပဲလုပ်ဖြစ်ဖို့များပါတယ်။ တစ်ခုခုတော့ပါမယ်။ တခြားအစီအစဉ်လဲပါပါမယ်။ အလှူကြီးပဲသီးသန့်ဖြစ်ချင်လဲဖြစ်မယ်။
-၂၅ နှစ်ပြည့်မွေးနေ့ရောက်တော့မယ်။ အသက်လဲတစ်နှစ်လဲကြီးတော့မယ်ဆိုတော့ ဘယ်လိုခံစားမိလဲ။
အသက်၂၅ ရောက်ပြီပေါ့။ အသက်၂၀ မပြည့်ခင်ကတော့ အသက် ၂၀ အရမ်းကျော်ချင်ခဲ့တယ်။ အသက် ၂၅ နောက်ပိုင်းကိုလဲ အရမ်းရောက်ချင်ခဲ့တယ်။ အခုပြည့်တော့မယ်လဲဆိုရော မြန်လှချည်လား။ မရောက်ချင်တော့ဘူးဖြစ်သွားပြန်ရော။ လူ့လောကထဲမှာနေလာတဲ့တောက်လျှောက်မှာ လူတွေရဲ့စိတ်ရယ်၊ အသက်ကြီးလာတာနဲ့အမျှပိုပြီးတော့စဉ်းစားတွေးခေါ်တတ်လာတယ်။ မကောင်းတာတွေကောင်းတာတွေကိုလဲ ဝေဖန်ပိုင်းခြားတတ်လာတယ်။
-ဒီနှစ်ထဲမှာလဲ မင်္ဂလာဆောင်တော့မယ်ဆိုတဲသတင်းတွေကြားနေရတယ်နော်။
အဲ့ဒါနဲ့ပတ်သက်ပြီးတော့ တစ်ချိန်ချိန်ကျရင်တော့ ညီမအတိအကျပြောပြပါ့မယ်။ အခုကတော့မပြောသေးပါဘူးရှင့်။ ညီမမွေးနေ့ဒါမှမဟုတ် မွေးနေ့အပြီးမှာ သိချင်မဲ့ပရိသတ်ကြီးကိုပြောပြပါ့မယ်။ မေးတာတွေရော ၊ မမေးတာတွေရောကို အကုန်ပြောပြပါ့မယ်။ မင်္ဂလာအစီအစဉ်ကတော့ ဒီနှစ်ထဲမှာဖြစ်ဖို့များနေပါတယ်။
-မိုးယုရဲ့ချစ်သူနဲ့ပုံလေးတွေလဲလူမှုကွန်ယက်ပေါ်မှာပျံ့နေတာမျိုးရှိတယ်။ သူ့ကိုရော ဘယ်လိုအချက်အလက်တွေကြောင့်ရွေးချယ်ဖြစ်သွားတာလဲ။
တစ်ချိန်ကျရင် ကိုယ်အိမ်ထောင်ဖက်အဖြစ်ရွေးချယ်တဲ့အခါ သူ့မိဘ ကိုယ့်မိဘနှစ်ဖက်မိဘကြည်ဖြူပြီးတော့ လက်ထပ်နိုင်တဲ့သူဖြစ်ရမယ်။ နောက်ပြီးတော့ ကိုယ့်ကိုတကယ်သစ္စာရှိရှိ ချစ်ရမယ်။ ညီမကနည်းနည်းတည်တည်ကြည်ကြည်နေတာမျိုးကိုကြိုက်တယ်။ သဘောကျတယ်။ ပြီးတော့ယောကျာ်းလေးဖြစ်တဲ့အတွက် အဓိကဦးဆောင်နိုင်ရမယ်။ နောက်ပြီးမိသားစုအပေါ်တန်ဖိုးထားပြီး တည်ကြည်တဲ့သူကိုညီမကသဘောကျတယ်။ အဲ့ဒီအချက်တွေကြောင့်ရွေးချယ်ဖြစ်သွားတာပါ။
-လတ်တလောမှာ မင်္ဂလာသတင်းပြောလိမ့်မယ်လို့ပရိသတ်တော်တော်များများက မမျှော်လင့်ထားကြဘူး။ ချစ်သူရှိနေတယ်ဆိုတဲ့ သတင်းအစအနမတွေ့ရတဲ့အတွက် မင်္ဂလာသတင်းနဲ့မိုးယုနဲ့ကိုအဝေးဆုံးမှာလို့ထင်နေကြတယ်။ မမျှော်လင့်ပဲနဲ့သိလိုက်ရတော့ နှမြောနေကြတဲ့ ပရိသတ်တွေလဲရှိတော့ သူတို့ကိုရော ဘယ်လိုပြောပြချင်လဲ။
ညီမအချစ်ရေးနဲ့ပတ်သက်ပြီး အတိအကျဖော်ပြတာမျိုးတွေအရှေ့မှာမရှိခဲ့ပါဘူး။ ချစ်သူရည်းစားလဲ မရှိခဲ့လို့ပါ။ အခုကတော့ ညီမချစ်သူရှိနေပါပြီ။ ဘယ်သူဘယ်ဝါလဲဆိုတာကို အတိအကျမပြောပြသေးတာပဲ ရှိပါတယ်။ အဲ့ဒါနဲ့ပတ်သက်ပြီး တချို့ပရိသတ်တွေကနှမြောကြတယ်။ တကယ့် Fan အစစ်တွေကကျတော့ ညီမအကြောင်းသိတယ်။ Fan တွေနဲ့စကားပြောဖြစ်တဲ့အခါ သူတို့ကပိုပြီး သဘောတူနေကြတယ်။ ဘယ်ဟာပဲဖြစ်ဖြစ် ကံအပေါ်မှာမူတည်တယ်။ ဒီအချိန်မှာ မိုးယုအိမ်ထောင်ပြုရမဲ့ ကံပါလာရင်တော့ ပြုကိုပြုဖြစ်မှာပဲ။ ကံမပါရင်တော့ပြုဖြစ်မှာ မဟုတ်ဘူးလေ။ အဲ့ဒီအတွက်ကြောင့်မို့လို့ကံကိုပဲပုံအပ်ထားတယ်။ အနုပညာအလုပ်နဲ့ပတ်သက်ပြီးတော့လဲ အဲ့ဒီအလုပ်ကို ညီမချစ်လဲချစ်တယ်။ ညီမအနုပညာအလုပ်နဲ့ပဲ ကိုယ့်မိသားစုကိုကျေးဇူးဆပ်ခွင့်ရတယ်။ ဒီအလုပ်ကိုလဲ အရမ်းဝါသနာပါပါတယ်။ အဲ့ဒါကြောင့် ဒီအလုပ်ကိုလဲတတ်နိုင်သလောက် ညီမလုပ်သွားမှာပါ။ ညီမအများကြီးလုပ်တာထက် ဒီအလုပ်ကို တန်ဖိုးထားတယ်။ ညီမကိုချစ်ခင်အားပေးတဲ့ပရိသတ်တွေကိုတန်ဖိုးထားတယ်။
-ပုံလေးတွေတက်လာတော့ အရမ်းလိုက်တယ်လို့ပြောကြတဲ့ပရိသတ်ရှိသလို တချို့အမျိုးသားပရိသတ်တွေကျတော့ အသည်းကွဲပြီတို့ဘာတို့တင်နေကြတဲ့ ပရိသတ်တွေလဲရှိတော့ အဲ့ဒီအပေါ်ကိုဘယ်လိုမျိုးလေးပြန်ပြောချင်ပါသလဲ။
ဘယ်လိုပဲဖြစ်ဖြစ်ပါ။ သဘောတူတဲ့သူပဲဖြစ်ဖြစ် မတူပဲ အသည်းကွဲတဲ့သူပဲဖြစ်ဖြစ် ပရိသတ်ကြီးကိုလဲ မိုးယုကချစ်ပါတယ်လို့။ အိမ်ထောင်ကျသွားပြီပဲဖြစ်ဖြစ်၊ မကျသေးဘူးပဲဖြစ်ဖြစ် ပရိသတ်ကြီးက မိုးယုရင်ထဲမှာအမြဲရှိပါတယ်။ နောက်ပြီးကိုယ့်ကိုအားပေးတဲ့သူတင်တဲ့ post မှန်သမျှကိုတော်တော်များများကြည့်ဖြစ်တယ်။ တချို့ဟာတွေဆိုမိုးယုမှတ်မိတယ်။ တချို့အကောင့်တွေဆိုညီမစကားပြောဖြစ်တယ်။ မိုးယုကိုအခုလိုအားပေးပြီးချစ်ကြတဲ့အတွက်ကျေးဇူးအများကြီးတင်ပါတယ်လို့။
-အန်တီစကားကိုအမြဲနားထောင်တဲ့သမီးအလိမ္မာတစ်ယောက်ဆိုတော့ အခုဆုံးဖြတ်ခဲ့တဲ့ အိမ်ထောင်ရေးကရော အန်တီ့စိတ်တိုင်းကျလား။ မိုးယုစိတ်တိုင်းကျဆုံးဖြတ်ခဲ့တာလား။
အိမ်ထောင်ရေးနဲ့ပတ်သက်ပြီး ညီမသဘော၊ ညီမစိတ်နဲ့ပါပဲ။ နောက်ပြီးတော့ ညီမမိဘတွေရဲ့ဆုံးဖြတ်ချက်လဲ ပါပါတယ်။ နောက် ကောင်လေးရော၊ ကောင်လေးဖက်ကအဖေအမေရော အားလုံးပါပါတယ်။ အားလုံးသဘောတူကြည်ဖြူကြလို့ပါ။
-အန်တီက အနုပညာအလုပ်နဲ့ပတ်သက်ပြီးအရင်က အရမ်းကို ထောက်ပံ့ပေးခဲ့တာဆိုတော့ အခုမိုးယုရဲ့ မင်္ဂလာသတင်းအပေါ်မှာရော သူ့ရဲ့အမြင်ကဘယ်လိုရှိလဲ။
အမေက အနုပညာအလုပ်ကို အရမ်းချစ်တယ်။ အရမ်းကို လုပ်စေချင်တယ်။ အိမ်ထောင်ကျကျ၊ မကျကျလုပ်စေချင်တယ်။ အဓိက အမေကတော့ အမှန်အတိုင်းပြောရရင် ညီမကိုနှမြောနေတယ်။ အနုပညာအလုပ်ကို အရမ်းဝါသနာပါတယ်။ အရမ်းလုပ်စေချင်တော့လေ။ ညီမလဲအိမ်ထောင်ကျသွားတဲ့အခါ ပရိသတ်အားပေးမှုလျော့သွားမှာကို အရမ်းစိုးရိမ်တယ်။ နောက်ပြီးတော့ ပရိသတ်ကြီးအတွက် ညီမသီချင်းလုပ်ဖို့ စီစဉ်ထားတာရှိတယ်။ အဲ့ဒါကြီးကလဲတိုးလို့တန်းလန်းဖြစ်နေတယ်။ ညီမအမှတ်တရအနေနဲ့ Fan တွေအတွက် သီချင်းခွေလုပ်ဖြစ်ခဲ့တယ်ဆိုရင် ဒီနှစ်ထဲမှာအိမ်ထောင်ပြုဖြစ်ခဲ့ရင် သီချင်းခွေကနောက်နှစ်ကိုရွှေ့သွားပြီလေ။ အဲ့ဒါကြောင့် အိမ်ထောင်ပြုဖို့မပြုဖို့ကို ဇဝေဇ၀ါဖြစ်နေတယ်။ ဒါပေမဲ့ ညီမတိုင်ပင်နေကြ Fan တွေရှိပါတယ်။ သူတို့ကတော့ မင်္ဂလာသတင်းကို အားပေးတယ်။ လုပ်စေချင်တဲ့အတွက် ရှေ့ဆက်တိုးနေပါတယ်။ သီချင်းကတစ်ခွေစာပါ။ တေးရေးတွေအပ်ထားပြီးပြီ။ ဆိုဖို့နဲ့တီးဖို့ပဲကျန်တယ်။ မင်္ဂလာပွဲလုပ်ဖို့မလုပ်ဖို့ချိန်နေတုန်းမို့လို့ပါ။ မင်္ဂလာပွဲလုပ်ဖြစ်ခဲ့တယ်ဆိုရင်လဲ ခါတိုင်းလိုပဲမိုးယုကိုအားပေးကြပါလို့ပြောချင်ပါတယ်။ သီချင်းခွေလုပ်နေတာ မိုးယု Fan တွေပဲသိတယ်။ အပြင်ပရိသတ်မသိဘူး။ ဒါပေမဲ့အခုမင်္ဂလာသတင်းကအရင်ပြန့်သွားတော့ မင်္ဂလာသတင်းကိုပဲ စိတ်ဝင်စားနေကြတယ်။
-အခုရွေးချယ်ထားတဲ့အိမ်ထောင်ရေးက နှလုံးသားနဲ့လား။ ဦးနှောက်နဲ့လား။
ပြောရရင်နှစ်ခုလုံးပါပဲ။ အရင်ဆုံး ပထမဆုံးစဉ်းစားလိုက်တာက ဦးနှောက်နဲ့စဉ်းစားလိုက်တာပါ။ နောက်တော့မှ နှလုံးသားပါပါသွားတာပါ။ အခုချိန်မှာတော့ ဦးနှောက်ရော၊ နှလုံးသားရော နှစ်ခုလုံးပါပဲ။
-စိတ်ကူးထဲကမင်္ဂလာပွဲပုံစံကဘယ်လိုမျိုးဖြစ်မလဲ။
စိတ်ကူးကတော့ ဖြစ်နိုင်တာတွေရော မဖြစ်နိုင်တာတွေရော အများကြီးယဉ်ထားတယ်။ မိန်းကလေးလဲဖြစ်တော့ စိတ်ကူးကတော့ယဉ်တယ်။ ဒါပေမဲ့ မိန်းကလေးနဲ့ယောကျာ်းလေးနဲ့ကမတူဘူး။ မင်္ဂလာပွဲလုပ်ဖြစ်ရင် ကိုယ်တစ်ယောက်တည်းဆောင်တာမဟုတ်ဘူး။ ယောကျာ်းလေးနဲ့မိန်းကလေးဖြစ်တဲ့အတွက်
 နှစ်ယောက်စလုံးအဆင်ပြေမဲ့ဟာပဲလုပ်ဖြစ်မှာပါ။
-အပြင်လောကက အမျိုးသားတစ်ယောက်ကို အိမ်ထောင်ဖက်အဖြစ်ရွေးချယ်ခဲ့တာကရော ဘယ်လိုကြောင့်များလဲ။
မိုးယုကသ၀န်တိုတတ်တယ်။ အဲ့ဒါကြောင့်အစကတည်းက အိမ်ထောင်ပြုဖြစ်မယ်ဆိုရင် အပြင်လူနဲ့ပဲယူမယ်လို့ဆုံးဖြတ်ထားတာပါ။ ဘာလို့လဲဆိုတော့ အနုပညာသမားအချင်းချင်းဆို အမှန်အတိုင်းပြောရရင် ကိုယ့်ချစ်သူက တခြားသူနဲ့အလုပ်တွဲလုပ်နေတာကိုမကြိုက်ဘူး။ နားလည်မပေးနိုင်ဘူး။ ဒါညီမအမှန်အတိုင်းပြောတာပါ။ ဘယ်လိုပဲစိတ်ချသည်ဖြစ်စေ၊ မချသည်ဖြစ်စေ အနုပညာအလုပ်လုပ်တာကို သဘောမကျပါဘူး။ အဲ့ဒါကြောင့်အပြင်လူပဲရွေးချယ်ဖြစ်ခဲ့တာပါ။
-မိုးယုမင်္ဂလာပွဲကို စောင့်မျှော်နေတဲ့ပရိသတ်တွေကိုရော ဘယ်လိုမျိုးပြောပြချင်သေးလဲ။
အားပေးတဲ့ပရိသတ်တွေကို ကျေးဇူးအရမ်းတင်ပါတယ်။ ညီမလဲအနုပညာနဲ့ပတ်သက်ပြီး တတ်နိုင်သလောက်လုပ်ဆောင်သွားပါမယ်။ အိမ်ထောင်ပြုပြီးရင်မလုပ်တော့ဘူးဆိုတာမျိုးမဟုတ်ပဲ ဆက်လက်လုပ်ကိုင်သွားမှာပါ။ သူကလဲခွင့်ပြုပါတယ်။ လူတစ်ယောက်အလုပ်လေးတစ်ခုရှိရင်ကောင်းတယ်လေ။ သူကလဲ အဲ့ဒီလိုပြောပါတယ်။ မိုးယုရဲ့စိတ်ဆန္ဒအတိုင်းပါပဲ။ အဲ့ဒါကြောင့် ပရိသတ်ကြီးကလဲ ဆက်လက်ပြီးအားပေးပေးကြပါလို့ပြောချင်ပါတယ်။

ခင်ဆွေသက် @