ၿပဳံယမ္း မွ ေနျပည္ေတာ္၏ အနာဂါတ္သို႔ ( 3/4 ) - မ်ိဳး၀င္း ၊ ပြုံယမ်း မှ နေပြည်တော်၏ အနာဂါတ်သို့ ( 3/4 ) - မျိုးဝင်း

ပြုံယမ်း မှ နေပြည်တော် အနာဂါတ်ဆီသို့ (3) 

မြန်မာဟာ 1990 ကျော်ကာလများမှာ ပြုံယမ်းနဲ့ သံအဆက်အသွယ် ဖြတ်ထားလို့ တရားဝင် ဆက်သွယ်ဖို့ မလွယ်ကူပါဘူး ။ ပြဿနာက 10-10-1983 မှာ ရန်ကုန်မြို့ အာဇာနည် ဗိမ္မာန်အား မြောက်ကိုရီးယား မှ လာရောက် ဗုံးဖောက်ခွဲ၍ ဖြစ်ပါတယ် ။

အဲဒီမတိုင်ခင်က 1977 မှာ ဦးနေဝင်းကို ဖိတ်ခေါ်လို့ မြောက်ကိုးရီးယားကို သွားခဲ့ရသလို 1980 မှာလည်း မြောက်ကိုရီးယား အလုပ်သမားပါတီ ရဲ့ ဆဌမအကြိမ်မြောက် ကွန်ဂရက်အစည်းအဝေးကို ဖိတ်ခေါ်လို့ မဆလ အဖွဲ့ဝင်တွေ သွားခဲ့ရပါတယ် ။

အဲဒီခရီးစဉ်တွေမှာ မြန်မာအဖွဲ့ကို တာဝန်ခံယူပြီး ဧည့်ခံခဲ့ရတာ ကင်အီဆွန်း ရဲ့ လူယုံ ကင်ယုံနစ် ဖြစ်ပါတယ် ။ သံဖြတ်ထားပြီး 1990 နောက်ပိုင်းမှာ မြန်မာ နဲ့ မြောက်ကိုရီးယားတို့ တိတ်တတိတ် ပြန်ဆက်သွယ်ကြရာမှာ 1983 အဖြစ်ဆိုးကို ဘယ်သူကမှ အစပြန်ဖော်ကြမှာ မဟုတ်ပါဘူး ။

အဲဒီလို တိတ်တဆိတ် ဆက်သွယ်ဆောင်ရွက်နေစဉ်ကာလမှာပဲ 8-7-1994 မှာ ကင်အီဆွန်း ကွယ်လွန်သွားပါတယ် ။ ဆက်ခံသူအား ရွေးခြယ်မသွားနိုင်ပဲ ကွယ်လွန်ခဲ့တဲ့ အတွက် ခြေ / ဥ အရ နိုင်ငံခြားရေးဝန်ကြီး ကင်ယုံနမ် (ပေါလစ်ဗျူရို အမှတ်စဉ် ၄ ) က ခေတ္တထိမ်းသိမ်းထားခဲ့ရပါတယ် ။

8-7-1994 မှ 5-9-1998 အထိ အုပ်ချုပ်ခဲ့တဲ့ ကင်ယုံနမ်အကြောင်း ပြောပြချင်ပါတယ် ။ မြန်မာ့အရေးနဲ့ ပါတ်သက်သူ မို့ပါ ။

ကင်ယုံနမ်ဟာ တရုတ်ပိုင်နက်ထဲမှာ မွေးခဲ့တဲ့ ကိုရီးယားလူမျိုးဖြစ်ပါတယ် ။ 1950 ကိုရီးယားစစ်ပွဲမှာ တရုတ်အပျော်တမ်း တပ်တွေနဲ့ ပြုံယမ်းဖက်ကနေ ဝင်တိုက်ပေးသူဖြစ်ပါတယ် ။

စစ်ပွဲပြီးတော့ ဆိုဗီယက်ကို သွားပြီး ဘွဲ့ရအောင် ကျောင်းတက်ခဲ့ပါတယ် ။ ဘွဲ့ယူပြီး မြောက်ကိုရီးယားကို ပြန်လာပါတယ် ။ နိုင်ငံခြားရေး ဌာနမှာ အလုပ်လုပ်ရင်း ရုရှား တရုတ် မြောက်ကိုရီးယား သုံးပွင့်ဆိုင် ကိစ္စရပ်များမှာ ကောင်းစွာ ညှိနှိုင်းပေးသူ ဖြစ်ခဲ့ရပါတယ် ။

ကင်အီဆွန်းအပေါ် ကားမက်စ် နဲ့ လီနင်အတွေးအခေါ်တွေကို သင်ပေးနိုင်သူဖြစ်ပါတယ် ။ သံတမန်ရေးရာ ကိစ္စများကို စီမံရသူဖြစ်ပြီး 1990 နောက်ပိုင်း မြန်မာ နဲ့ ဆက်သွယ်ရေးလုပ်ဖို့ တရုတ် နဲ့ ရုရှားက တဆင့် စီစဉ်နိုင်သူလည်း ဖြစ်ပါတယ် ။

သို့သော် မြန်မာနဲ့ မြောက်ကိုရီးယား တပ်မတော် ၂ ခု အကြား စစ်ဘက်ဆိုင်ရာ ပူးပေါင်းမှုများကိုတော့ ခေါင်းဆောင်သစ် ကင်ဂျုံအီး (ကင်အီဆွန်း သား) ကသာ ဆုံးဖြတ်ပါတယ် ။

မြန်မာအစိုးရ အတွက် မြောက်ကိုရီးယားကို ပေါ်ပေါ်ထင်ထင် သွားခဲ့ရတဲ့ ခရီးကတော့ မြန်မာနိုင်ငံခြားရေး ဝန်ကြီးသွားခဲ့ရတဲ့ မြောက်ကိုရီးယား ခရီးစဉ်ဖြစ်ပါတယ် ။

29-10-2008 မှာ မြန်မာနိုင်ငံခြားရေးဝန်င်္ကြး နဲ့ အဖွဲ့ မြောက်ကိုရီးယားကို ထွက်ခွါခဲ့ရတဲ့ ခရီးစဉ်ကတော့ ကင်ယုံနမ်က စတင်ဖိတ်ခေါ်လို့ပါပဲ ။

ဦးဉာဏ်ဝင်းရဲ့ ခရီးစဉ်အပြီးမှာ မြန်မာ့တပ်မတော်အတွက် အလွန်အရေးကြီးတဲ့ ခရီးစဉ်တခု ဖြစ်ပေါ်လာခဲ့ရပါတယ် ။ အဲဒီခရီးကိုတော့ ကင်ဂျုံအီရဲ့ ခွင့်ပြုမှု နဲ့ မြောက်ကိုရီးယား စစ်ဦးချုပ် Kim Kyak Sik ၏ ဖိတ်ကြားမှုကြောင့် သွားခဲ့ရတဲ့ မြန်မာ့တပ်မတော် ကိုယ်စားလှယ်တွေရဲ့ ခရီးစဉ် ဖြစ်ပါတယ် ။

ဒီခရီးစဉ်ကိုတော့( 21-11-2008 )မှ (12-12-2008) ထိ ကြာမြင့်စွာ သွားရောက်ခဲ့တဲ့ မြန်မာ့တပ်မတော်ရဲ့ နံပါတ်စဉ် ၃ ဖြစ်သူ ဗိုလ်ချုပ်ကြီးသူရရွှေမန်းက ဦးဆောင်ခဲ့ရပါတယ် ။

ဒီခရီးစဉ်ကို သွားကြတဲ့အခါ သံရုံးများ တရားဝင် ပြန်ဖွင့်မထားရသေးလို့ ဦးရွှေမန်းတို့ အဖွဲ့ဟာ တပ်မတော် ယူနီဖောင်းများနဲ့ ဘေဂျင်းကို ဦးစွာသွားကြပါတယ် ။ နောက် အရပ်ဝတ် ( ဥရောပဝတ်စုံ) တွေနဲ့ ဘေဂျင်း မှ ပြုံယမ်း သို့ 883 မိုင် ခရီးအား ရထားဖြင့် ဆက်လက်ထွက်ခွါခဲ့ရာ ၂၄ နာရီမျှ စီးနင်းခဲ့ရပါတယ် ။

ထူးခြားချက်ကတော့ ဦးရွှေမန်းတို့နဲ့ အတူ ပြုံယမ်းသို့ တရုတ်တပ်မတော် စစ်ဦးချုပ် ဗိုလ်ချုပ်ကြီး Chen Bingde ကိုယ်တိုင် အတူလိုက်ပါလာခြင်းပဲ ဖြစ်ပါတယ် ။

မြောက်ကိုရီးယားကို ရောက်သွားတဲ့ ဗိုလ်ချုပ်ကြီးသူရရွှေမန်းတို့ အဖွဲ့ဟာ

- ဒုံးကျည်စက်ရုံများ

- စကာ့ဒ်ဒုံးများအဆင့်မြှင့်မှုများ

- နျူကလီးယားဒြပ်ပေါင်းဖို တည်ဆောက်ခြင်းများ

- မြေအောက်ဥမင်လှိုဏ်ခေါင်းတူးဖော်ခြင်းများ ကို အထူးပြု လေ့လာ မှတ်သားကြပါတယ် ။

အဲဒီနောက် စစ်ဘက်ဆိုင်ရာ အကူညီပေးရေး စာချုပ်များ ချုပ်ဆိုခဲ့ပါတယ် ။ အရေးကြီးတဲ့ နျူကလီးယား သဘောတူညီချက်များအတွက် မြောက်ကိုရီးယား ရဲ့ တနိုင်ငံထဲ သဘောနဲ့ ဆောင်ရွက်မရတဲ့ အတွက် ရုရှား နဲ့ တရုတ်တို့က သွယ်ဝှိက်ကူညီနိုင်မှ အဆင်ပြေမှာ ဖြစ်လို့ တရုတ်စစ်ဦးစီးချုပ်ကိုယ်တိုင် ပြုံယမ်းကို လိုက်ပါလာခြင်း ဖြစ်ပါတယ် ။

ဦးသန်းရွှေဟာ သူတစ်ပါးအမှားကနေ သင်ခန်းစာယူပြီး နိုင်ငံအတွက် အကောင်းဆုံးတည်ဆောက်နေတာ တွေ့ရပါတယ် ။ သူက အီရတ်ပြဿနာကို လေ့လာကြည့်ပါတယ် ။

အီရတ်တပ်မှူးကြီးတွေဟာအလွန်အမင်း ကြွားဝါပြီး အလုပ်မဖြစ်တဲ့စီမံချက်တွေနဲ့ ဆဒမ်ကို လိမ်ညာခဲ့ကြပါတယ် ။ စစ်ဇုံကြီး ၅ ဇုံနဲ့ ခုခံထားပြီး အတွင်းဆုံးက ဇုံအတွက် ဆဒမ်ရဲ့ ယောက်ဖကိုယ်တိုင် ကွပ်ကဲပြီး တိုက်မတဲ့ ။ ဒီလို ရေပက်မဝင်တဲ့ စီမံချက်တွေ တင်ပြခဲ့ပြီး ရွှန်းရွှန်းဝေအောင် ကြွားဝါခဲ့တဲ့ အီရတ်တပ်မှူးတွေဟာ တကယ်တိုက်တော့ ၅၉ ရက်ပဲ ကြာပါတယ် ။

ခေတ်မှီလေယာဉ်တွေဆို ဂိုဒေါင်ထဲကတောင် မထုတ်လိုက်ရပဲ ရှုံးသွားခဲ့ပါတယ် ။ 13-12-2013 မှာ လုံခြုံမှု မရှိတဲ့ ဗုံးခိုကျင်းထဲမှာ ဆဒမ်ကို အထီးကျန်စွာ ဖမ်းမိသွားတာကို သင်ခန်းစာယူပါတယ် ။

- ကြိုတင်ပြင်ဆင်မထားတဲ့ ဗုံးကျင်းထဲမှာ ခိုအောင်းခြင်း

- သစ္စာဖောက်တဦးဥိးက သတင်းပေးခြင်း

- အသံလွှင့်၍ ကျူးကျော်သူယမ်းကီးတွေကို ချေမှုံးကြ ဘာညာ နဲ့ နေ့စဉ်ပြောနေသောကြောင့် ရေဒီယိုလှိုင်းမှ ခြေရာခံသွားခြင်း

အစရှိတဲ့ ဆဒမ်ရဲ့ ကိုးယို့ကားယား အမှားတွေကို သုံးသပ်ပြီး ငါသာဆိုဘာလုပ်မလဲ ဆိုတဲ့ ဆုံးဖြတ်ချက်ချဖို့ အားထုတ်ပါတော့တယ် ။

မြေအောက်လှိုဏ်ခေါင်း ကွန်ယက်ရတွေကို စနစ်တကျ ဖြန့်ကျက်ထားပြီး ကွပ်ကဲမှု ဗဟိုဌာနချုပ် (GHQ) တွေရဲ့ တည်နေရာကို လျှို့ဝှက်နေရာတွေမှာ ထားနိုင်မယ်ဆိုရင် အချိန်ကာလ အတော်ကြာ တောင့်ခံနိုင်မယ်လို့ တွက်ဆပါတယ်။

အဲဒါကြောင့် 2005 မှာ အစိုးရရဲ့ အုပ်ချုပ်မှုယန္တယားတခုလုံးကို နေပြည်တော်သို့ ပြောင်းရွှေ့ဖို့ စီစဉ်နေဆဲ မှာပဲ စစ်ဘက်ကွပ်ကွဲမှု ဌာနချုပ်ကိုလည်း နေပြည်တော်ရဲ့ အရှေ့ဖက် ၁၂ မိုင်အကွာက ပေါင်းလောင်းတောင်စောင်းနေရာမှာ စနစ်တကျ ရွှေ့ပြောင်းထားပါတော့တယ် ။

ဦးသန်းရွှေဟာ အလွန်စနစ်ကျတဲ့ တွက်ချက်မှုတွေနဲ့ နိုင်ငံရေး စစ်ရေး အခြေအနေများကို မိမိလိုသလို စေ့စေ့စပ်စပ် ဖော်ဆောင်ခဲ့ပါတယ် ။

နိုင်ငံရေးခွါစစ်အတွက် 2008 ခြေ / ဥ ကို နောက်ချန်တပ် 25 % နဲ့ ရင်ဆိုင် ထိမ်းချုပ်ထားပြီး သက်တောင့်သက်သာ ဆုတ်ခွါဖို့ စီမံထားသလို စစ်ရေးလုံခြုံမှုအတွက် မြောက်ကိုရီးယား နဲ့ ဆက်ဆံရေးတိုးမြှင့်ပြီး ဘက်စုံကာကွယ်ရေးစနစ် မြှင့်တင်နိုင်ရန် ဗိုလ်ချုပ်ကြီး သူရရွှေမန်းကို မြောက်ကိုရီးယားသို့ စေလွှတ်ခြင်း ဖြစ်ပါတယ် ။

အင်မတန် စကားနည်းလှပြီး သူဖြစ်ချင်တာကို ကျိတ်ပြီး ကြံစည်တတ်၍ အောင်မြင်အောင် လုပ်ဆောင်လေ့ ရှိတဲ့ အလွန်ပါးနပ်သူ ဗိုလ်ချုပ်မှူးကြီးသန်းရွှေဟာ ဦးရွှေမန်းကို ယုံကြည်ကိုးစားပြီး မြောက်ကိုရီးယားကို လွှတ်လိုက်တဲ့ နေရာမှာ ဦးရွှေမန်း ဘာတွေ ဆောင်ရွက်လာမလဲ ဆိုတာ လေ့လာကြည့်တော့ ,,,,,,,,,,,,,,,?

ပြုံယမ်း မှ နေပြည်တော် အနာဂါတ်ဆီသို့ (4)

 

ဦးရွှေမန်းတို့ အဖွဲ့ဟာ ပြုံယမ်းမှာ 2008 ကုန်ပိုင်းကာလ၌ ချုပ်ဆိုခဲ့တဲ့ စစ်ရေးစာချုပ်တွေမှာ ဘယ်အချက်တွေ ပါဝင်နေပါသလဲ ? စိတ်ဝင်စားစရာ ကောင်းတဲ့ ပိုင်းက စလာပါပြီ ။

သာမန် လှိုဏ်ခေါင်းတူးခြင်း ၊ နျူထိပ်ဖူးတပ် ဒုံးများထုတ်လုပ်ရန် စက်ရုံတည်ဆောက်ခြင်းများ အတွက် မဟုတ်ပါဘူး ။ ဒီထက်ကြီးမားတဲ့ ကိစ္စများအတွက် စာချုပ်ချုပ်ဆိုခဲ့ကြတာပါ ။

အထက်က ပြောခဲ့တဲ့ လှိုဏ်ခေါင်းတူးတာ ၊ ဒုံးစက်ရုံတည်ဆောက်တာတွေက 2003 မှ 2006 အတွင်း ကြံစည်လုပ်ဆောင် အကောင်အထည် ဖော်ပြီးခဲ့ပါပြီ ။ ယခု 2008 မှာ တပ်မတော်ရဲ့ နံပါတ် ၃ ခေါင်းဆောင် ပြုံယမ်းအထိ သွားပြီး ချုပ်ခဲ့တဲ့ စစ်ရေးစာချုပ်အတွက် ဒီထက်အရေးကြီးတာတွေ ပါမယ်ဆိုတာ ခန့်မှန်းလို့ ရနေပါပြီ ။

ဒီလှိုဏ်ခေါင်းတွေ နဲ့ ဒုံးစက်ရုံတွေအကြောင်းကို ဘာတီးလတ်တနာက RFA ကနေ သတင်းရေးသားထုတ်လွှင့်ခဲ့တာ 18-6-2009 က ဖြစ်ပါတယ် ။

သူ့ဆောင်းပါးပါ မြောက်ကိုရီးယား နဲ့ မြန်မာစစ်အစိုးရတို့ရဲ့ ပူးပေါင်းဆောင်ရွက်မှုကို မှန်ကန်ကြောင်း ထပ်မံအတည်ပြုပေးလိုက်တာက မြောက်ကိုရီးယား သစ္စာဖောက် Kim Kwang Jin ဖြစ်ပါတယ် ။

သူဟာ စင်္ကာပူမှာ ငွေကြေးဝန်ဆောင်မှုလုပ်ကိုင်သူအဖြစ် ဟန်ဆောင်ပြီး မြောက်ကိုရီးယားအတွက် နိုင်ငံခြားငွေ ရှာပေးနေရသူဖြစ်ပြီး အာဏာရှင်မိသားစုနဲ့ ရင်းနှီးကြွမ်းဝင်သူ ဖြစ်ပါတယ် ။

အာဏာရှင် မိသားစုရဲ့ ငွေကြေးအတွင်းသတင်းတွေ ပေါက်ကြားမှုမှာ သူ့ကို မသင်္ကာဖြစ်နေမှန်း သိချိန်မှာပဲ တောင်ကိုရီးယားကို မိသားစုလိုက်ထွက်ပြေးပြီး ခိုလှုံနေသူဖြစ်ပါတယ် ။ RFA မှာလည်း ကော်လံစားသတင်းထောက်လုပ်ကိုင်ရင်း ယခုလို ဘာတီးလတ်တနာ ရဲ့ ဆောင်းပါးကို ထောက်ခံလိုက်တာပါ ။

မြောက်ကိုရီးယား ထိပ်သီးအာဏာရှင် မိသားစုနဲ့ ရင်းနှီးသူဖြစ်လို့ သူလည်း မြန်မာ နဲ့ ပြုံယမ်းရဲ့ ဆက်ဆံရေးလမ်းကြောင်းကို သိနိုင်ပါတယ် ။

ဗိုလ်ချုပ်မှူးကြီးသန်းရွှေဟာ ပြုံယမ်း နဲ့ ပူးပေါင်းဆက်ဆံ ဆောင်ရွက်ရာမှာ အပိုင်းကဏ္ဍ ၂ ခု ခွဲထားပါတယ်

၁ ။ လျှို့ဝှက်ဥမင်လှိုဏ်ခေါင်းများတူးခြင်း

၂ ။ တာလတ်ပစ်ဒုံးများ နဲ့ နျူကလီးယား ဒြပ်ပေါင်းဖို တည်ဆောက်ခြင်း

ဆိုပြီး လုပ်ဆောင်ထားခဲ့ပါတယ် ။

မြောက်ကိုရီးယားတွေဟာ မြေအောက် လှိုဏ်ခေါင်းတူးဖော်ခြင်း နည်းပညာမှာ ထိပ်ဆုံးက နိုင်ငံဖြစ်ပါတယ် ။ ပါလက်စတိုင်းတွေက အစ္စရေးနိုင်ငံထဲ အထိ မြေအောက်လှိုဏ်ခေါင်းများတူးပြီး ဝင်ရောက်ဖောက်ခွဲခြင်းတွေ လက်နက်အသွင်းအထုတ် မှောင်ခိုလုပ်ငန်းတွေကို လုပ်ကိုင်ခဲ့ကြပါတယ် ။

အင်မတန်လည်လှပါသော အစ္စရေး နဲ့ အမေရိကန်တွေ လုံးဝမသိခဲ့ရပဲ နှစ်များစွာကြာမှ လှိုဏ်ခေါင်းတွေကို တွေ့ရှိကြပါတယ် ။ အဲဒီလှိုဏ်ခေါင်းတွေကို အီရန်က ငှါးပေးလို့ မြောက်ကိုရီးယားတွေက တိတ်တဆိတ် တူးပေးခဲ့ကြတာပါ ။

မြောက်ကိုရီယားဟာ အီရန်နိုင်ငံကို တာတိုပစ်ဒုံးလက်နက် နည်းပညာတွေ ရောင်းပေးခဲ့ပါတယ် ။

ဒါ့အပြင် ဆီးရီးယားနိုင်ငံရှိ ယူဖရေးတီးဖြစ်ဘေးမှာ နျူကလီးယား ဒြပ်ပေါင်းဖိုတခု တည်ဆောက်ပေးခဲ့တာလည်း မြောက်ကိုရီးယားပါပဲ ။ တည်ဆောက်ပြီးဆီးခါနီး 2007 စက်တင်ဘာလ မှာ အစ္စရေးက ဗုံးကြဲဖျက်ဆီးလိုက်လို့ မြောက်ကိုရီးယား နျူပညာရှင် 10 ယောက် သေဆုံးခဲ့ရဖူးပါတယ် ။

ပြောချင်တာက မြောက်ကိုရီးယားရဲ့ ပြည်ပပို့ကုန်ဟာ လှိုဏ်ခေါင်းတူးပေးခြင်း ၊ နျူကလီယား ထုတ်လုပ်ခြင်း နဲ့ တာတို တာလတ် တာဝေး ပစ် ဒုံးလက်နက် နဲ့ နည်းပညာရောင်းစားခြင်း ဆိုတာ သိစေချင်လို့ ဖြစ်ပါတယ် ။

ဒီလိုနည်းပညာတွေ ပိုင်ဆိုင်ထားပြီး နျူလက်နက်တွေ လက်ဝယ်ကိုင်ထားတဲ့ မြောက်ကိုးရီးယားဟာ နိုင်ငံပေါက်စ ခေါင်းဆောင်ပေါက်စ ( အသက်ငယ်) လေးက ကမ္ဘာ့ငပွကြီး အမေရိကန် ထရမ့်ရဲ့ နားရွက်ကို အကြိမ်ကြိမ်တံတွေးစွပ်ပြနေတာ ထရမ့်ကြီး မလှုပ်ရဲတာကို သဘောပေါက်ကြမှာပါ ။

သူတချက် တချက် ထဖောက်လိုက်ရင် အင်အားကြီး အနောက်နိုင်ငံခေါင်းဆောင်ကြီးတွေ ခေါင်းခဲနေရတာဟာ နည်းပညာ နဲ့ လက်နက်တွေကြောင့်ဆိုတာ ဦးသန်းရွှေကောင်းစွာ သဘောပေါက်လို့ မြောက်ကိုရီးယားနဲ့ ပူးပေါင်းဖို့ ကြိုးစားခဲ့တာပါပဲ ။

2004 ကုန်ခါနီးမှာ မြောက်ကိုရီးယား မှ ပညာရှင် ၁၀၀ လောက် နေပြည်တော်ကို စတင်ရောက်ရှိလာပါတယ် ။ သူတို့ထဲမှာဥမင်လှိုက်ခေါင်းတူးပညာရှင်များ ၊ နျူကလီးယားပညာရှင်များ ၊ နျူကုန်ကြမ်း ယူရေနီယံရှာဖွေရေးပညာရှင်များ အထိ ပါဝင်နေပါတယ် ။

အဲဒီ ပညာရှင်တွေကို ပြင်ဦးလွင်ရှိ တပ်မတော် နည်းပညာ အကယ်ဒမီ(DSTA) မှာ နေရာချထားပေးပြီး ဌာနချုပ်အဖြစ် သတ်မှတ်ပေးခဲ့ပါတယ် ။ သူတို့နဲ့ အတူ ကာကွယ်ရေးဝန်ကြီးဌာန သိပ္ပံနဲ့နည်းပညာသုတေသန မှာ ထူးချွန်သူ အရာရှိများနဲ့ စစ်သည်များအား တွဲဖက်တာဝန်ချထားပေးခဲ့ပြီး နည်းပညာများ သင်ယူစေခဲ့ပါတယ် ။

2004 နဲ့ 2005 ခုနှစ်တွေမှာ နေပြည်တော်ကို အကြီးအကျယ် တည်ဆောက်နေချိန်ဖြစ်လို့ တရုတ်တွေနဲ့ တူတဲ့ မြောက်ကိုရီးယားတွေကို ဒေသခံတွေကတော့ မြင်ဖူးနေကျ တရုတ်တွေလို့ပဲ ထင်မှတ်နေကြပါတယ် ။

{ 2009 - မှာ အမေရိကန်ကို ထွက်ပြေးပြီး ဖော်ကောင်လုပ်ခဲ့တဲ့ သစ္စာဖောက်လောက်ကောင် စိုင်းသန်းဝင်းဟာ 2001 မှ 2005 အထိ ရုရှားမှာ နျူပညာသင်ယူနေရလို့ ယခုအကြောင်းတွေကို သူမသိပါဘူး ။ ရွံရှာဖွယ် သစ္စာဖောက်အကြောင်း နောက်မှရေးပါ့မယ်}

2004 က စပြီးရောက်လာတဲ့ မြောက်ကိုရီးယားပညာရှင်တွေဟာ မြေပြင်ကွင်းဆင်းစစ်ဆေးခြင်း ၊ ဖြစ်နိုင်ခြေဆန်းစစ်ခြင်း ၊ မြေသားဓာတ်ခွဲခြင်း ၊ ဘူမိရူပ အကြိုလုပ်ငန်း ( မြေသား ကျောက်သား ဥမင်လှိုဏ်ခေါင်းများဟာ သာမန် သိုလှောင်ရုံ သွားလာရုံမဟုတ်ပဲ ဆက်သွယ်ရေးစက်များနဲ့ပါ အလုပ်လုပ်နိုင်ရန်အတွက် သံလိုက်စက်ကွင်း တိုင်းတာရခြင်း ကဲ့သို့သော အချက်များနဲ့ ထောင့်စေ့အောင် တွက်ချက်ပြီးမှ တိကျစွာ ဆောင်ရွက်ရပါတယ် ) လုပ်ကိုင်ကြပါတယ် ။

နောက်ပြီး တဆက်တည်းမှာပဲ ပေါင်းလောင်းတောင်ကျောရှိ ပမာဏကြီးမားသော မူရွှေသိုက် (primary) တွေပါ ရှာဖွေကြပါတယ် ။ မြစ် ချောင်း များမှာ တွေ့ရတဲ့ အမှုံအမွှားတွေဟာ မူလရွှေသိုက်မှ တိုက်စားပြီး ပါလာရတဲ့ ရွှေသာဖြစ်ပြီး မူလရွှေသိုက်များမှာတော့ ကျောက်ချပ်များ ကြားညှပ်နေသော ရွှေချပ်များ အစိုင်အခဲများ တွေ့ရတတ်ပါတယ် ။

ဒီလိုတလက်စတည်း ရှာဖွေတာ ကျွဲကူးရေပါ လုပ်နည်းပါပဲ ။ မြောက်ကိုရီးယား နဲ့ မြန်မာတို့ရဲ့ အဆိုပါလုပ်ငန်းများအတွက် အခကြေးငွေ သတ်မှတ်ရာမှာ ဒေါ်လာနဲ့ မပေးချေပဲ ဆန် သီးနှံ ရာဘာ သစ် ရွှေ တို့နဲ့ ပေးချေဖို့ ( barter စနစ်) သဘောတူထားလို့ ဖြစ်ပါတယ် ။

ဘာတီးလတ်တနာ ပြောခဲ့ဖူးပါတယ် ။ မြောက်ကိုရီးယားကို လေယယာဉ်နဲ့ ပျံဝဲပြီး အပေါ်စီးကလိုက်ကြည့်ပါတဲ့ ။ တောင်ကြိုတောင်ကြား တနေရာမှာ မီးခိုးထွက်နေရင် သေချာပြီး မြေအောက်မှာ မြောက်ကိုရီးယားတွေ အလုပ်တခုခု လုပ်နေကြပြီ တဲ့ ။

ဟုတ်ပါတယ် မြောက်ကိုရီးယားတွေဟာ အလုပ်လုပ်ရင် လျှို့ဝှက်လုပ်လေ့ရှိကြပြီး မြေအောက်လှုဏ်ခေါင်းတွေမှာ သူတို့ရဲ့ နျူလက်နက်တွေ သိုဝှက်ထားတာ ကြည့်ပါ ။

မြန်မာပြည်အတွက် လှို့ဝှက်နေရာ ၇ နေရာ သတ်မှတ်ပြီး လုပ်ငန်းစတင်ဖို့ Lay out plan ဆွဲပြီးပါပြီ ။ ထိုနေရာများသို့ လုပ်ကိုင်ရန် မြောက်ကိုရီးယာ ပညာရှင် 1000 ဟာ 2005 နှစ်စမှာ ရောက်လာပါပြီ ။ နေပြည်တော် နဲ့ ပြင်ဦးလွင်မှာ နေရာခွဲထားလိုက်ပါတယ် ။

နေပြည်တော် ၊ တောင်ကြီး ၊ မင်းဘူး ၊ ရခိုင်ရိုးမ အန်း ၊ ပြင်ဦးလွင် ၊ ရွာထောင် စက်ခေါင်းပြင်ရုံ ၊ အင်းစိန်စက်ခေါင်းရုံ ၊ စသည့် နေရာတွေမှာ မြေအောက် လှိုဏ်ခေါင်းတွေ ဖောက်ကြပါတယ် ။

ရခိုင်ပြည်နယ် မအီတောင်ခြေက အနောက်ပိုင်းတိုင်းစစ်ဌာနချုပ် အနီး ဖောက်လုပ်ခဲ့တဲ့ မြေအောက်လှိုဏ်ခေါင်းထဲမှာ တိုက်ခိုက်ရေး ဂျက်တိုက်လေယာဉ်များ နဲ့ ဘင်္ဂလားဒေ့ရ် အား အချိန်တိုအတွင်း ချေမှုံးဖျက်ဆီးနိုင်တဲ့ တာတိုပစ် ဒုံးကျည် အမြောက်အများကို ဖြန့်ဝေ ချထားပြီး ဖြစ်ပါတယ် ။

ဂြိုလ်တု ဓာတ်ပုံများအား လှည့်စားနိုင်ရန် လျှပ်စစ်စီမံကိန်းများနဲ့ ပုံဖျက်တည်ဆောက်ထားပါတယ် ။

အချို့သော ဥမင်လှိုဏ်များသည် ရှစ်မိုင်အထိ ရှည်လျှားပြီး အကျယ် ပေ ၂၀ အမြင့် ၁၅ ပေ အထိ ရှိကြပါတယ် ။ လျှပ်စစ် ၊ ရေ နဲ့ မီးငြိမ်းသတ်ရေး စနစ်အထိ ပြည့်စုံစွာ တည်ဆောက်ထားကြပါတယ် ။

ကားတစီး ချောင်ချိစွာ မောင်းနှင်နိုင်ပြီး ချို့နေရာများမှာ ပြီးပြည့်စုံတဲ့ အစည်းအဝေးခမ်းမတွေအထိ ထည့်သွင်း ဖောက်လုပ်ထားပါတယ် ။

ဒီလိုတွေ စနစ်တကျ လျို့ဝှက်စွာ တည်ဆောက်ခဲ့တဲ့ ဗိုလ်ချုပ်မှူးကြီး သန်းရွှေ အပေါ် သူ့ရဲ့ ပြောစကားတွေ ဟန်ပန် အမူအရာတွေ အပေါ်ကြည့်ပြီး သူ့ရဲ့ ပင်ကိုယ်စိတ် နဲ့ အရည်အချင်းကို မခန့်မှန်းနိုင်ပါဘူး ။

ပြည်ပက ဝေဖန်သူတွေကတော့ ဦးသန်းရွှေဟာ ခန့်မှန်းရခက်ခဲတဲ့ ကြောင်လက်သည်းဝှက်လို လူစားလို့ ပြောဆိုကြပါတယ် ။

သူ့အာဏာသက်တမ်း ၂၃ နှစ်လောက်မှာ တပ်မတော်နေ့အခမ်းအနားများမှာ မိန့်ခွန်းပြောခြင်း နဲ့ စစ်တက္ကသိုလ်ကျောင်းဆင်းပွဲများမှာ တိုတိုတိတိ မိန့်ခွန်းပြောခြင်းမှ အပ အခြားအခမ်းအနားတွေမှာ ပြောလေ့မရှိပါဘူး ။

အဲဒီလို ပိပိရိရိ နေထိုင်တတ်ပြီး ထူထူထိုင်းထိုင်း အောက်သိုးသိုးမျက်နှာကြီး နဲ့ မရယ်မပြုံး နေတတ်တဲ့ အညာသားကြီးကို ပြည်ပကလူတွေ မပြောနဲ့ သူနဲ့ အနီးကပ်နေရတဲ့ တပ်မှူးကြီးတွေတောင် မခန့်မှန်းနိုင်ကြပါဘူး ။ ဘယ်လက်က လုပ်တာ ညာလက်က မသိစေနဲ့ ဆိုတဲ့ လူစားကိုး ဗျ ။

သူရဲ့ ပိရိသေသပ်တဲ့ အနေအထိုင်နဲ့ နျူစီမံချက်တွေဘယ်လိုပါတ်သပ်နေသလဲဆိုတာ နိဂုံးချုပ်မှာ တွေ့လာပါမယ် ။

ဇာတ်ကြောင်းပြန်စရမယ်ဆိုရင် ဒီလို လျှို့ဝှက်လှိုဏ်ဂူတွေ ဖောက်လုပ်နေတဲ့ လုပ်ငန်းတွေဟာ 2006 မှာ အားလုံးနီးပါး ပြီးသွားပါပြီ ။

- ကုန်ကျငွေ ဘယ်လောက်လဲ ?

- ဘယ်ကရှာကြမလဲ ?

ဆိုတာကတော့ ,,,,,,,,,,,,,?

( မူရင်းအတိုင်းသာ ကူးယူဖော်ပြခြင်းဖြစ်ပါသည် )