ရွှေရေးထင်ထင် ၏ မဟာ့…မဟာ ဂန္တ၀င် အိပ်မက်ရှည်ကြီး

Photos of Shweyay Htin Htin

 ယခုတစ်လော အမျိုးသမီး ပိုင်းလော.တစ်ဦးပြီးနောက် Facebook တွင်( သူမ၏ ဓါတ်ပုံအချို.ကြောင်. )နာမည်ကျော်ကြားလာသော စာရေးဆရာမ ( သူမကတော. သူမကိုယ်ကို စာပေ၀ါသနာရှင်ဟု သုံးနှုံး ပါသည် ) ရွှေရေးထင်ထင် (ပေါင်းစပ်ခြင်းအနုပညာ ဓါတ်ပုံအလင်္ကာ Group Page မှာ Admin အဖြစ် ပါဝင်ပြီး ကဗျာရေးသားနေသူ တစ်ဦး လည်း ဖြစ်ပါသည် )၏ Facebook စာမျက်နှာတွင် မေလ ၂၂ ရက်နေ.က ရေးတင်ထားသော Satire တစ်ပုဒ်အား ကူးယူဖော်ပြပါသည် ။

 အကျွန်ုပ် ရွှေရေးထင်ထင် သည် လွန်ခဲ့သော နှစ်က သူငယ်ချင်းများစွာပါဝင်သည့် အိပ်မက်ရှည်ကြီးအား မြင်မက်ခဲ့ပြီနောက် ……………… ထိုကဲ့သို့ မမြင်မက်တော့ သည်မှာ ကာလ အတန်ကြာပင် ရှိခဲ့လေပြီ။

တစ်နေ့ သော်…………. အကျွန်ုပ်သည် FB ထဲတွင် " ကျွန်မက နှင်းဆီပါ မောင် " ဟူသော စကားအားပြက်ရယ်ပြုခြင်း ၊ ၅ % အခွန်ကိစ္စ အားဝိုင်းဝန်း ရှုံ့ ချခြင်း ၊ လတ်တလော ရေပန်းစားကာ ၀န်းရံခံနေရသော FB ဆယ်လီများ သတင်း…….. အစရှိသော Post များအား ဖတ်နေချိန်တွင် သူငယ်ချင်း ၁ဦးက Screen Shot ရိုက်ထားသော ပုံတစ်ပုံအား ပေးပို့ လာလေတော့သည်။

ထိတ်လန့် ဖို့ ကောင်းလှလေစွ။ အကျွန်ုပ် အား ၀န်းရံဖို့  စီစဉ်နေကြသည် ဆိုပါတကား။ အလွန် တုံးအ လှသော အကျွန်ုပ် သည် ဤရက်ပိုင်း Friend Request များလာခြင်း ၊ Follower များလာခြင်း ၊ Chat Box ထဲတွင် ပေးပို့  သော စာတွေ မတရားများလာခြင်း ကြောင့် ဖွင့်ဖတ်မရအောင် ဖြစ်လာခြင်း………တို့  သည် ၀န်းရံခံရခြင်း ဖြစ်ကြောင်း ယခုမှပင်ရိပ်စားမိတော့၏။

ထိုကြောင့်……… ထိုနေ့ ည၌ ထိတ်လန့် ခြင်းကြီးစွာဖြင့် အိပ်ယာဝင်ရလေရာ အလွန်ထူးဆန်းသော အိပ်မက်အား မြင်မက်လေမိတော့၏။ ထိုအိပ်မက်သည်ကား………………………………………………..
***************************************************************************************

ရွှေရေးထင်ထင်

အကျွန်ုပ် သည် ၀တ္တုရှည်ကြီး တစ်ပုဒ်အား ရေးသားရန် အလို့ ငှာ ဇာတ်ကွက် စဉ်းစားနေစဉ် ၀ုန်းခနဲ အိမ်တံခါးပွင့်လာ၏။ ၀င်လာကြသည်က အနောက်တိုင်း အနက်ရောင် Suit များ ကျနစွာ ၀တ်ဆင်ထားပြီး နေကာမျက်မှန် အနက်များတပ်ဆင်ထားသော လူ၃ယောက် ……… ။ ထိုသူတို့ ၏ ခက်ထန်မာကြော တိကျပြတ်သားလှသော အသွင်သဏ္ဍာန်သည် အနောက်တိုင်း ရုပ်ရှင်ကားများထဲမှ FBI , CIA တို့ နှင့် အလားတူလှပေစွ။ ထိုသူတို့ က အကျွန်ုပ်အား ချိုင်းမှ တဖက်တချက် မကာ အိမ်ထဲမှ ဆွဲထုတ်လေတော့သည်။
အကျွန်ုပ်လည်း ကြောက်လန့် တကြီးဖြင့် အကျိုးအကြောင်းမေးရာ
" တိတ်စမ်း !!! ရုံးရောက်ရင် အားလုံးသိရမယ် " ဟု မာန်မဲလေတော့သည်။ ထိုလူများသည် ကျွန်ုပ်အား BMW ကားတစ်စီးထဲသို့  အတင်းအကြပ် တင်လိုက်ကြပေ၏။

Oh….My God
ကားထဲရောက်မှ ပို၍ အံ့သြရပေတကား။ ကားထဲတွင် လတ်တလောရေပန်းစား နာမည်ကြီးနေသော FB ဆယ်လီကြီး Thakhin Pilotcaptdaonenine ရှိနေလေသည်။ ထို Pilot ဆယ်လီကြီးက
" ညီမလေး ဘာမှ မလန့် နဲ့ ……ဆွေးနွေးစရာရှိလို့  အကို တို့ ကို သူ့ တို့ ဆရာက အခေါ်လွှတ်လိုက်တာ "……ဟု အားပေးစကား ပြောရှာသည်။ ထိုသို့ ရှင်းပြနေဆဲ တခဏအတွင်း မောင်းနေသော ကားက တုံ့ ခနဲ့ ရပ်သွားကာ ကျွန်ုပ်တို့ ကို ဆင်းခိုင်းလေတော့သည်။
**********************************************************************************************

ဒုတိယအကြိမ်…… Oh My God
ကျွန်ုပ် တို့ ရောက်နေသည်မှာ လွန်စွာလှပ တင့်တယ်၍ တိမ်မြူတိမ်စိုင် တွေကြား၌ တည်ရှိသော နတ်ပြည် ဖြစ်နေလေတော့သတည်း။ ရွှေရောင်တ၀င်းဝင်း နှင့် လွန်စွာလှပသော တန်ဆောင်ကြီး တစ်ခု ရှေ့ ၌လည်း လူသူအများစုရုံးနေကြ၏။

ကျွန်ုပ် က သိ၍ ကျွန်ုပ် ကိုလည်းသိသော...
ကျွန်ုပ် က သိ၍ ကျွန်ုပ် ကို မသိကြသော...
ကျွန်ုပ် က မသိသော်လည်း ကျွန်ုပ် ကို သိကြသော...
FB မှ လူများစွာ ပါရှိကြကုန်၏။ အံ့သြတကြီး နှင့် ငေးမောနေစဉ်… လက်မောင်း၌ တာဝန်ဆိုသော စာလုံးကို အနီပတ် ပတ်ထားသော နတ်သား တစ်အုပ်ထွက်လာကာ ကျွန်ုပ် နှင့် Pilot ဆယ်လီကြီး အား ဆွဲခေါ်လေတော့သည်။

( လှည်းတန်း မှာ မဟုတ်ပဲ နတ်ပြည် ဖြစ်လို့ သာ တော်သေးပေစွ )

" လာ….လာ… မင်းတို့  ၂ယောက် ပဲ နောက်ဆုံးကျန် လို့  စောင့်နေတာ.."
တန်ဆောင်း ထဲ ၀င်လာကြရာ ဆိုင်းဘုတ်များ ထောင်၍ နေရာများ ကန့် သတ်ထားခြင်းအား တွေ့ ရ၏။
သိကြားမင်း ဦးဆောင်သော တရားသူကြီးအဖွဲ့ 
FB တွင် ၀န်းရံခံရသော ဆယ်လီများ အဖွဲ့ 
ဆယ်လီများအား ၀န်းရံကြသူများ အဖွဲ့ 
ပြည်သူများအဖွဲ့ …………………..
ဟူ၍ အမျိုးမျိုး ရှိကြကာ ဘယ်အုပ်စုထဲ ၀င်ရပ်ရမည်နည်း ဟု စဉ်းစားနေဆဲတွင် တာဝန် အနီပတ်နှင့် နတ်သားတို့ က FB တွင် ၀န်းရံခံရသော ဆယ်လီများ အဖွဲ့ ထဲသို့  တွန်းထိုးထည့်သွင်းလိုက်လေတော့၏။
ထိုအဖွဲ့ ထဲတွင် ….. နာမည်ကြီး ဒါရိုက်တာများ ၊ မင်းသားများ ၊ မင်းသမီးများ ၊ အဆိုတော်များ ၊ မော်ဒယ်များ ၊ စာရေးဆရာများ ၊ Sexy ဓါတ်ပုံများဖြင့် နာမည်ကြီးသူများ ၊ အလှပဂေး Lady Boy များ ၊ ဆရာဝန်များ ၊ Pilot များစွာ ရှိနေကြလေသည်။ ထိုသူများကြားဝယ်…… စာရေးဆရာယောင်ယောင် ဘာယောင်ယောင် အကျွန်ုပ် မှာ အသာလေး ခပ်ကုပ်ကုပ် နှင့် ရပ်နေရလေတော့၏။

ထိုစဉ် နတ်သားကြီးတစ်ဦးထွက်လာ၏။
" ကျုပ်က သိကြားမင်း အိမ်တော် ရဲ့ ပြောရေးဆိ်ုခွင့် ရှိသူပါ ….. အားလုံး စုံညီ စည်းဝေးရတာကတော့ ဖုန်းဆက်သွယ်ရေးများ အပေါ် ၅ % အခွန်ကောက်ဖို့  ကိစ္စ နှင့် ပတ်သက်လို့ ပါ…ဆက်သွယ်ရေး ကုမ္ပဏီတွေက ဒီ အခွန် ကို ပြည်သူတွေက ပေးဆောင်ရမယ် လို့ ဆုံးဖြတ်လိုက်တယ်….ဒီအခါ ပြည်သူတွေက မကျေမနပ် ဖြစ်ပြီး သိကြားမင်း ဆီ တိုင်တန်းလာပါတယ်…ဖုန်းငွေဖြည့်ရခြင်း ရဲ့  ၇၀%သော အကြောင်းရင်းက FB သုံးကြလို့ ပါတဲ့…ဒီတော့ FB သုံးသူများပဲ အခွန်ဆောင်သင့်ပါတယ်…ပုံမှန် ဖုန်းသုံးစွဲခြင်းအတွက် အခွန်မဆောင် သင့်ဘူးလို့  ငြင်းကြတယ် "

ဤ စကား ကြားတော့ FB ပရိတ်သတ် က ပွက်လောညံကုန်သည်။ စာနယ်ဇင်း သမားတွေကလည်း ပြောရေးဆိုခွင့်ရှိသူ နတ်သားကြီး နှင့် ပွဲတက် ပရိတ်သတ် အပေါင်း ကို ဓါတ်ပုံတွေ တဖျပ်ဖျပ် ရိုက်သူ ရိုက် ၊ နတ်သားကြီး ထံ recorder လေး ထိုးပေးသူ ပေး နှင့် အလုပ်ရှုပ်နေ၏။
သတင်းထောက်များအား ကြည့်လိုက်ရာ …..

တတိယအကြိမ်…… Oh My God
ကျွန်ုပ် Fri List ထဲရှိသူများတွေပါလား။ ကင်မရာ မီးရောင်တွေကြားမှ နတ်သားကြီး က ဟန်ပါပါ နှင့် ဆက်ပြော၏။
" FB သုံးသူတွေ ကို ဆန်းစစ်လိုက်တော့ ၃၀% က သတင်း၊အတင်း၊ပညာ၊လူမှုဆက်ဆံရေး အနေနဲ့ သုံးတာ ဖြစ်ပြီး ၇၀%ကတော့ ၀န်းရံခံရသူ ဆယ်လီ နဲ့  ၀န်းရံသူပရိတ်သတ် အုပ်စု ဖြစ်နေပါတယ်…ဒီတော့ အခွန်ကို ၀န်းရံသူပရိတ်သတ် ကပဲ တာဝန်ယူဆောင်ပေးဖို့ ရာ သင့်တော်ပါတယ် လို့  ဆက်သွယ်ရေး ကုမ္ပဏီ နဲ့  ပြည်သူတွေက ဆုံးဖြတ်ထားပါတယ် "

ထိုအခါတွင် ၀န်းရံသူ ပရိတ်သတ်က ဒေါသတကြီး …… တစ်ယောက်တစ်ခွန်း ထအော် လေတော့သည်။
" ကျုပ်တို့ က ၀န်းရံပေးရတယ် ဆိုတာ လွယ်တာ မှတ်လို့  … လိုင်းမကောင်းတဲ့ ကြားက ဆယ်လီတွေ နဲ့  ဆယ်လီဖြစ်လာလတ္တံ့ သူတွေ ရဲ့ ပုံတွေ ရှာဖွေ Post တင်…သူတို့ တွေရဲ့ Acc ကို စုံစမ်းလာသူတွေကို လမ်းညွှန်ပေးရသေး… Page တွေမှာ ပုံတွေ ရောက်သွားအောင်လည်း ဖြန့် ပေးရသေး…… အိုး…… လုပ်ပေးရတာတွေ နည်းသလား …… အဲဒါတွေ အားလုံးက အလကား လုပ်ရတာမှ မဟုတ်တာ… MB နဲ့ အမျှ Bill က ကုန်သေး "

" ဟုတ်ပါ့ဗျာ…… ကျုပ်တို့ ဝန်းရံ မှ သူတို့ က ဆယ်လီ ဖြစ်လာမှာ… ကျုပ်တို့ ချီးကျုးပြီး comment ပေးမှ သူတို့  ဆယ်လီ ဖြစ်တာ…အမှန်ဆို ကျုပ်တို့ က ဆယ်လီတွေကို ဖော်ထုတ်ပေးနေတဲ့သူ… ဒီတော့ အခွန်တော့ ကျုပ်တို့  မဆောင်နိုင်ဘူး "

" အေးဗျ…..ဖြစ်သင့်တာက အခုလို FB မှာ ကျုပ်တို့  အချိန်ဖြုန်းပြီး ကြည့်စရာ ပုံတွေတင်တဲ့ သူတွေကိုပဲ အခွန်ကောက်သင့်တာ…အဓိက က ဆယ်လီတွေပဲ "

ဟိုက်…ရှားပါး….လိုရင်း က ဒီလိုကိုး ။ အခွန်အတွက် အစိုးရက ဆက်သွယ်ရေး ကုမ္ပဏီ ကို လက်ညှိုးထိုး… ကုမ္ပဏီတွေက ပြည်သူတွေကို လက်ညှိုးထိုး……ပြည်သူတွေက FB သမားတွေကို လက်ညှိုးထိုး…… ထိုထဲကမှ ဆယ်လီတွေကိုပဲ ကွက်ကွက်လေး ရွေးချယ်…… အခွန်ဆောင် ဖို့ ဖိအားပေး……
ဘုရား…ဘုရား… ရှိစုမဲ့စု ပုံလေးတွေထဲက လူ့ သဘာဝ ပီပီ လှတာလေးရွေးပြီး FB တင်မိတာ အခွန်တာဝန်သည် အကျွန်ုပ် တို့ လူနည်းစု ဖက်လှည့်လာပါရော့ လား။ ၁ ဦးကို ၅% နှုန်း….. လူသန်း ၆၀ ခန့် ဆိုလျှင် မည်မျှနည်း။ ထိုပမာဏ အတွက် လက်တစ်ဆုပ်စာ ဆယ်လီလူနည်းစု က သာ တာဝန်ယူ ပေးဆောင်ရလျှင် ခက်ရချေရဲ့ ။ ဆယ်လီတွေ ထဲက တစ်ဦးက မကျေမနပ်နှင့် ထပြောတော့၏။

" ဒါ မတရားဘူး….သိကြားမင်း နဲ့ ပြောမယ် "
ထိုအခါ နတ်သားကြီး က
" သိကြားမင်း အခု ၄ဦးဆိုင် အစည်းအဝေး ထိုင်နေတယ်…မအားသေးဘူး….တော်ကြာ လာမယ် "
( လေသံက မာလိုက်သည့် ဖြစ်ခြင်း )
" ၄ ဦးဆိုင် ဆိုတော့ ဘယ်သူတွေ နဲ့ လဲ "
" သိကြားမင်း ၊ MPT ၊ Telenor ၊ Oredoo "
" ၄ဦး ဆိုင်ဆိုတာ တသီးပုဂ္ဂလ ဆန်လွန်းတယ်……ငါတို့ က ၁၂ ဦး ဆိုင် ဆွေးနွေးပွဲ ပဲ လက်ခံနိုင်မယ် "

ထိုအခါ…… ပြောရေးဆိုခွင့် နတ်သားကြီး က မှင်သေသေဖြင့်
" ရတယ်လေ……ဟေ့…အားတဲ့ ကောင်လေး ၈ ယောက်လောက် အထဲဝင်ထိုင် ပေးနေလိုက်ကြစမ်း "
ထိုအခါ တာဝန် အနီပတ် နတ်သား၈ယောက် က ဆွေးနွေးခန်း ထဲသို့ အလျှင်အမြန်ပြေးဝင်သွား၏။ ဆယ်လီတွေ ထဲမှ ထအော်သည်။

" ကျုပ်ပြောတာ … ပြည်သူ ၊ ဆယ်လီ ၊ ပရိတ်သတ် ၊ စာနယ်ဇင်းတွေထဲက ထပ်ထည့်ပေးဖို့ ပြောတာဗျ…ခင်ဗျားတို့  ကိုယ့်လူတွေကြီး နဲ့ ပဲ ပင်းပြီး ကြိတ်ဆွေးနွေးလို့ ရမလား "
ပြောရေးဆိုခွင့် ရှိသူ နတ်သားကြီး က ဖြုံတောင် မဖြုံ….မျက်နှာတောင် မော့လိုက်သေး။ စာနယ်ဇင်းသမားများဖက် ဟန်ပါပါ လှည့်ကာ
" အခုဆိုရင် သိကြားမင်းကြီးက ၁၂ ဦးဆိုင်ပွင့်ပွင့်လင်းလင်း ဆွေးနွေးပွဲကြီး လုပ်နေပါပြီ……၄ ဦးဆိုင် မဟုတ်တော့ဘူးနော်…သတင်းမှာ ပြင်ရေးပေးပါ ….သူငယ်တို့ .."
ကဲ….အကျွန်ုပ် ဘာများတတ်နိုင်အံ့…. သိကြားမင်း ထွက်အလာ စောင့်ရုံသာ ရှိတော့သည်။

သိကြားမင်း ထွက်လာလေပြီ။ ဆက်သွယ်ရေး ကုမ္ပဏီ မှ လူများခပ်ကုပ်ကုပ် နှင့် အလျှင်စလို ပြန်သွားကြသည်။ သိကြားမင်း က သက်ပြင်းရှည်ကြီး ချရင်း
" ဆွေးနွေးပွဲ ရဲ့ ရလဒ် ကတော့ တစ်နိုင်ငံလုံး ဆောင်ရမဲ့ အခွန်ပမာဏ ကို FB ဆယ်လီများက ၇၀% အထိ တာဝန်ယူ ဆောင်ပေးစေ "
ဆယ်လီတွေ ဒေါပွကုန်ကြလေပြီ။ စောဒက တက်၏။ သို့  သော်….သိကြားမင်း က သဘောထားမပြောင်း။

" မင်းတို့ ပုံတွေတင်လို့  အများက ငွေကုန်ခံ ၀န်းရံပေးရတာ…မင်းတို့ တာဝန် ရှိသပေ့ါကွယ် "
ထိုအချိန် နတ်သမီး ထဲမှ တစ်ဦး ထလာ၏။
" ကျွန်မ က သုဇိတာ ပါ…မောင် "
FB ပရိတ်သတ် ၀ါးခနဲ ပွဲကျသွား၏။

" မောင့် ကိုအမြဲ အကြံကောင်းတွေပေးလာတာပါ … ဒီနေ့  ဆွေးနွေးပွဲ ဒီလောက် နဲ့ ရပ်သင့်ပါပြီ…မောင် "
သုဇိတာ က FB ဆယ်လီမမတွေကို ခပ်တင်းတင်း ဝေ့၀ဲကြည့်သည်။ သိကြားမင်း က FB ဆယ်လီ အမျိုးကောင်းသား များကို ခပ်စိမ်းစိမ်း တချက်ကြည့်လိုက်သည်။ ပြီးတော့မှ သိကြားမင်း က
" ဒီနေ့ ဆွေးနွေးပွဲ အောင်မြင်စွာ ပြီးဆုံးကြောင်း ကြေငြာပါတယ် "
အိပ်ငိုက်နေသော နတ်သားအချို့ ဘုမသိ ဘမသိ လက်ခုပ်တီး အားပေးလိုက်ကြလေသည်။

အလိုလေ….ဒီလို အဖြေ နှင့် အဆုံးသတ်တော့ ခက်ရချေပေါ့ ။ သို့ နှင့် အကျွန်ုပ်က ထပြောမည် ပြင်ရာ ဆယ်လီ Pilot ကြီးက အသာဟန့် လိုက်၏။

" မပြောနဲ့ တော့ ညီမလေးရေ… သိကြားမင်း က အကိုတို့  ကို မနာလို ဖြစ်နေတာ….သူက တဖက် မှာ ရှိလှ နတ်သမီး ၄၀၀/၅၀၀…စုစုပေါင်း မှ ၁၀၀၀ လောက်ပေါ့…အကို ဆို ဘေးမှာ ၀န်းရံနေတဲ့ အချောအလှ နတ်သမီးလေးတွေ ဘယ်လောက်ရှိမလဲ စဉ်းစား သာကြည့်…သုဇိတာ ကလည်း ညီမလေး တို့ ကို မနာလို ဖြစ်နေတာ…သူကမှ သိကြားမင်း ၁ယောက်တည်းရယ်… ညီမလေး မင်းဆိုရင် စုစုပေါင်း ဘယ်နှစ်ယောက်တောင်ရှိမလဲ…"
ဒီတော့မှ အကျွန်ုပ် တွက်မိ၏။

အင်း…နတ်သား…အဲ…လူသား…ပရိတ်သတ် တွေက တဖက်တချက်စီမှာ ထောင်ကျော်စီ ရံလို့ ……။ အို….သူတို့ အားလုံး အား အကျွန်ုပ် နိုင်နင်းပါမည်လော?? ဆိုလိုသည်က ၀န်းရံသူ အားလုံး စိတ်ချမ်းသာအောင် ပြန်စာရေးဖို့  အကျွန်ုပ် နိုင်နင်းပါမည်လော?? ဒီကြားထဲ ၀န်းရံသူများ ကောင်းမှုကြောင့် ဆယ်လီတန်းထဲ မျက်စိလည် လမ်းမှားလာသော စာရေးဆရာ ယောင်ယောင် ဘာယောင်ယောင် ကျွန်ုပ်သည် မတရား အခွန်ဆောင်ရချေဦးမည်။

အပြန်ခရီးတွက် အကျွန်ုပ်လည်း စိတ်ပျက်စွာဖြင့် နတ်ဗိမ္မာန် ထိပ်မှ ဖြတ်သွား ဖြတ်လာ လေယာဉ်တစ်စီး အား တားရန် စောင့်ရင်း
" FB သုံးမိ အပြစ် ရှိပါတယ်…သိကြားမင်း ရယ်"
ဟုသာ ရေရွတ်နေမိရတော့၏။

သို့ ကလို ရေရွတ်ရင်း နှင့်ပင်….အကျွန်ုပ် ရွှေရေးထင်ထင် သည် မဟာအိပ်မက်ကြီး မှ လန့် နိုးလာခဲ့ရလေတော့သည်တကား ။ ။

Photos from Shweyay Htin Htin  Facebook

ရွှေရေးထင်ထင် ၏ Facebook Account Link

ဆက်စပ်ဖတ်ရှုရန်

* ရွှေရေးထင်ထင် နှင်. ဧရာဝတီ အင်တာဗျုး